Pas publikimit të lajmit se gazetari Eduart Ilnica është rrahur barbarisht nga Presidenti i Klubit të Kastriotit, ka reaguar vetë klubi përmes një deklarate për shtyp. Klubi distancohet nga dhuna e ushtruar nga ana e Alban Voglit, duke sqaruar se ai, nuk është President i Kastriotit por shefi i Klubit të sporteve në Bashkinë e Krujës.
“Ndaj, çdo incident personal i individëve jashtë fushës së futbollit nuk i përket KF Kastriotit, e as lojtarëve, trajnerëve apo zyrtarëve të Klubit të Futbollit Kastrioti,” thuhet në deklaratën e klubit.
Deklarata e plotë e KF Kastroti
KF Kastrioti dëshiron të informojë gjithë opinionin publik mbi ngjarjet e fundit dhe përbaltjen e emrit të një ekipi elitar të futbollit Shqiptar nga persona që për interesa personale kërkojnë të dëmtojnë imazhin e tij.
“KF Kastrioti” është një shoqëri me kapital të kufizuar me 75% të aksioneve private dhe 25% të aksioneve publike ( Bashkia Krujë). Aksionet private zotërohen nga z.Oltion Shehi, që është edhe president i Klub Futboll Kastrioti.
Përsa i përket prononcimeve të fundit që e etiketojnë z.Alban Vogli president, po ju informojmë që personi në fjalë është shefi i klubit të sporteve në Bashkinë e Krujës.
Ndaj, çdo incident personal i individëve jashtë fushës së futbollit nuk i përket KF Kastriotit, e as lojtarëve, trajnerëve apo zyrtarëve të Klubit të Futbollit Kastrioti.
Për sa kohë drejtesia nuk është shprehur, ndërkohë që nëpër media qarkullojnë informacionet që gazetari i dhunuar e paska njohur z.Vogli nga fotot, dëshirojmë t’ju bëjmë me dije se distancohemi zyrtarisht nga çdo veprim i dhunshëm dhe arbitrar që kërkon të prishë imazhin e KF Kastriotit.
Ndërsa përsa i përket pretendimeve të KS Korabit, se një person i pa autorizuar ka qëndruar në pankinën e KF Kastriotit në ndeshjen Korabi-Kastrioti, personi në fjalë është Z.Gazmend Vogli, që në klub mban postin e drejtorit sportiv të KF Kastriotit me kontratë të rregullt pune i çertifikuar edhe nga Federata Shqiptare e Futbollit.
Ndaj, personi në fjalë nuk është person i pa autorizuar për të qenë në pankinë siç u shpreh z.Shemsi Prenci në një program televiziv, por është zyrtari i KF Kastriotit, ku sipas rregullores në pankinë lejohet të qëndrojë një zyrtar i klubit të futbollit.
Kemi respektuar çdo rregull të vendosur nga institucioni suprem i futbollit shqiptar dhe kemi paraqitur çdo dokument zyrtar mbi deklaratën e sipër cituar. javanews/ a.k
