Romano Prodi: Me krizën kineze nuk bëhet shaka
Ish-kryeministri italian dhe ish-presidenti i Komisionit Europian Romano Prodi ka tërhequr vëmendjen këto orë për peshën dhe rëndësinë e krizës kineze. Sipas tij, për të dalë nga stuhia financiare që ka nisur në Pekin, duhet organizuar me urgjencë një tryezë ku të marrin pjesë të gjitha fuqitë e mëdha botërore. Përndryshe, paralajmëron Prodi, bota rrezikon të ketë një rënie të dytë të fortë, si ajo e disa viteve më parë, kur falimentuan institucionet më të mëdha financiare amerikane.
Problemi i Kinës, sipas Prodit, është tek fakti që “kalimi nga ekonomia e bazuar tek eksportet, tek ajo që ushqehet nga konsumi i brendshëm kombëtar, po rezulton një proces më i vështirë sesa mendohej”. Dhe kjo, thotë ekonomisti dhe politikani i njohur italian, ndodh sepse vendet ku Kina eksporton, janë në gjendje të vështirë ekonomike dhe financiare. Ndërkohë që, thotë Prodi, edhe kostot e brendshme të krahut të punës në Kinë janë rritur. “Një saldator që dikur merrte 150 dollarë në Shangai, sot merr 800”, shprehet ai.
Romano Prodi thotë se Kina ndodhet aktualisht para nevojës urgjente të kryerjes së një procesi kompleks riorganizimi të sistemit bankar, të shëndoshjes së bilanceve të ndërmarrjeve publike dhe të provincave, si dhe të përballjes me problemin e sektorit të madh imobiliar. Sipas tij këto janë simptomat e një ekonomie të madhe që ka nevojë për një rishikim tërësor.
