Mënyra se si partnerët ndajnë detyrat e shtëpisë mund të ndikojë drejtpërdrejt në kënaqësinë që përjetojnë në marrëdhënien e tyre.
Hulumtimet kanë treguar se përgjegjësia për të planifikuar dhe organizuar jetën familjare rëndon më shpesh mbi gratë.
Ndoshta nuk janë qirinjtë aromatikë apo darkat e kushtueshme çelësi i një marrëdhënieje më të mirë. Sipas disa gjetjeve, një veprim shumë më i zakonshëm, si të dish kur duhet nxjerrë koshi i mbeturinave, mund të ketë rëndësi.
The Times i referohet një sërë studimesh psikologjike që tregojnë se marrëdhëniet nuk ndikohen vetëm nga ndarja e punëve fizike të shtëpisë. Një rol të rëndësishëm luan edhe “barra mendore”, e cila përfshin kujtimin, planifikimin dhe organizimin e detyrave familjare.
Kjo barrë mund të lidhet me rezervimin e vizitave të fëmijëve te dentisti, planifikimin e aktiviteteve të tyre, kujdesin për rrobat që duhen larë dhe mbajtjen mend të ditës kur duhet të nxirren mbeturinat.
Gratë marrin përsipër pjesën më të madhe të barrës mendore
Një kërkim i drejtuar nga psikologia Verena Klein, nga Universiteti i Southamptonit, analizoi mënyrën se si çiftet e ndajnë këtë përgjegjësi.
Në studim morën pjesë 452 gra britanike që bashkëjetonin me partnerë meshkuj, si edhe 156 çifte heteroseksuale nga Britania dhe Shtetet e Bashkuara.
Gjetjet treguan se, në shumicën dërrmuese të rasteve, gratë ishin ato që përballonin pjesën më të madhe të organizimit mendor të jetës familjare.
Studiuesit vunë në dukje se kjo pabarazi nuk ishte e padukshme për burrat. Edhe ata ishin të vetëdijshëm për ndarjen jo të barabartë të kësaj përgjegjësie.
“Pabarazia ishte shumë e qartë. Nuk ishte thjesht një perceptim i grave që burrat nuk e shihnin. Të dy partnerët raportonin të njëjtën gjë”, tha Klein.
Kush i kryen detyrat nuk është i vetmi faktor
Për gratë, lidhja mes kënaqësisë në marrëdhënie dhe mënyrës se si ndahej barra mendore ishte më e fortë sesa lidhja me personin që kryente fizikisht punët e shtëpisë.
Për shembull, një partner mund t’i vendosë rrobat në lavatriçe, ndërsa tjetri mund të jetë përgjegjës për të kujtuar kohën e larjes, për të blerë detergjentin dhe për të koordinuar detyrat e tjera.
Gratë deklaruan se ndiheshin më të kënaqura në marrëdhënie kur përgjegjësitë mendore shpërndaheshin në mënyrë më të barabartë.
Te burrat u vu re një rezultat i kundërt: ata raportuan kënaqësi më të lartë kur partneret e tyre merrnin përsipër një pjesë më të madhe të barrës mendore.
Barra e organizimit mund të lidhet edhe me kënaqësinë seksuale
Sipas studimit, gratë shfaqnin kënaqësi më të madhe seksuale kur partnerët e tyre angazhoheshin më shumë në përgjegjësitë emocionale dhe organizative të marrëdhënies, përfshirë planifikimin e aktiviteteve romantike dhe të rasteve të veçanta.
Kërkime të tjera kanë evidentuar gjithashtu një lidhje mes ndarjes së punëve të shtëpisë dhe kënaqësisë seksuale.
Në vitin 2022, studiues nga Universiteti Queen’s në Ontario shqyrtuan më shumë se 1,000 nëna. Ato që kryenin një pjesë më të madhe të punëve të shtëpisë raportonin dëshirë seksuale më të ulët ndaj partnerit.
Rënia e dëshirës lidhej veçanërisht me partnerë që nuk angazhoheshin në detyrat që kishin të bënin me fëmijët ose që nuk jepnin kontribut të mjaftueshëm në organizimin e jetës sociale dhe familjare.
Studiuesit hodhën hipotezën se kjo mund të ndikojë te dëshira seksuale, pasi gratë mund t’i shohin partnerët jo si të barabartë, por si njerëz që varen prej tyre.
Ndarja e detyrave shoqërohet me kënaqësi më të madhe te çiftet
Një studim tjetër, i udhëhequr këtë vit nga Universiteti i Colorado Boulder, arriti në përfundimin se pabarazia në punët e shtëpisë lidhej më shpesh me uljen e dëshirës seksuale te gratë që kishin qëndrime më të barabarta për rolet gjinore.
Edhe kërkimi i Universitetit të Kalifornisë në Los Anxhelos, UCLA, ku u përfshinë rreth 3,500 të rritur amerikanë, nxori një përfundim të ngjashëm.
Personat që ishin më të kënaqur me mënyrën e ndarjes së punëve të shtëpisë deklaruan njëkohësisht kënaqësi më të lartë në marrëdhënie dhe në jetën seksuale.
Megjithatë, studiuesit sqarojnë se këto rezultate nuk dëshmojnë se ndarja e punëve të shtëpisë shkakton drejtpërdrejt përmirësimin e jetës seksuale. Ato tregojnë vetëm një lidhje mes faktorëve dhe nuk vërtetojnë shkakësinë.
Një mundësi tjetër është që çiftet më të lumtura në marrëdhënien e tyre të jenë edhe më të afta për ta organizuar jetën e përbashkët.
Edhe kujtimi i detyrave përbën një përgjegjësi
Psikologia Klein thekson se nuk duhet anashkaluar pesha e barrës mendore.
Nxjerrja e mbeturinave është një detyrë më vete, por përgjegjësia për të kujtuar ditën kur duhet bërë kjo është një tjetër detyrë. Kur njëri partner duhet t’i rikujtojë vazhdimisht tjetrit çfarë duhet të kryejë, barra mendore vazhdon të mbetet tek ai.
Ndarja e përgjegjësive në çift nuk përcaktohet vetëm nga personi që kryen një punë, por edhe nga ai që duhet ta mbajë mend dhe ta planifikojë atë.
