Super jahti “Rising Sun”, një prej anijeve private më luksoze në planet ka prekur ujrat shqiptare sot. Lajmin e bën të ditur studiuesi Auron Tare, i cili është përfshirë në ardhjen e këtij superjahti në Shqipëri.
Tare thekson se Shqipëria mund të kthehet në një destinacion të rëndësishëm për turizmin elitar të jahteve. “Pakkush beson se bregdeti ynë mund të tërheqë të tillë vizitorë, por ardhja e këtij superjahti sot në Shqipëri besoj se më jep të drejtë”, thekson ai.
Sipas studiesit Auron Tare, ardhja e Rising Sun në ujërat tona është një shenjë e qartë se ne jemi seriozë për të ndërtuar një infrastrukturë dinjitoze dhe se bregdeti ynë mund të kthehet me të vërtetë në një destinacion shumë të rëndësishëm për këtë industri.
Rising Sun është dizenjuar nga Jon Bannenberg dhe ndërtuar më 2004 në Gjermani nga Lürssen, për Larry Ellison, sekretar ekzekutiv i Oracle Corporation. Për herë të fundit është ripërshtatur më 2007. Që nga viti 2010, Rising Sun është pronë e David Geffen, producent filmash dhe filantrop amerikan.
Jahti është 138 metra i gjatë, i 11-ti në botë, dhe ndërtimi i tij ka kushtuar 300 milionë dollarë. Mban 16 bujtës në 8 dhoma, si dhe një ekuipazh prej 35 personash.
d.i.
