Menaxhimi i ri i Ujësjellës Kanalizimeve Tiranë do të sjellë dhe një mënyrë të re të pagesës së taksave të bashkisë së kryeqytetit. Kreu i bashkisë Erjon Veliaj tha gjatë një aktiviteti të UKT-së, se duke nisur nga viti i ardhshëm të gjitha detyrimet e bashkisë do të jenë në një faturë të vetme, të shpërndarë në 12 muaj.
“Ju vetë e dini se shkoni të merrni një certifikatë, ju thonë ‘ik paguaj taksën e pronës dhe pastaj hajde merrni certifikatën’. Vendimi që kemi marrë duke nisur nga fundi i këtij viti, të gjitha detyrimet e bashkisë do të jenë në një faturë të vetme, të shëprndarë në 12 muaj, dhe nuk do të ketë më probleme për të marrë certifikatë. Kjo është arsyeja pse të gjitha faturat do të kondesohen në një të vetme”, tha Veliaj.
Veliaj tha se 70% e ujit të pijshëm në Tiranë humbet, vidhet ose shpërdorohet. Aktualisht bëri të ditur kreu i bashkisë së kryqyetit janë bllokuar 15 autobote, dhe janë arrestuar 10 punonjës të UKT-së.
“Kemi organizuar disa grupe pune task force si rezultat i të cilës ne kemi nbërë disa bllokime, sekuestrime, arrestime. Janë bllokuar 15 autobote, kemi arrestuar 10 punonjës të UKT, dhe tolerancë zero për këdo punonjës. Kemi bllokuar veprimtarinë e lavazheve apo subjekteve private me lidhje të paligjshme. Në total njësitë e UKT vetëm në këtë muaj të parë kanë ndërprerë 10 mijë pika furnizimi me ujë të pijshëm për arsye debie, njerëz që nuk paguajnë faturën e ujit. Me ujë të pijshëm spërkaten rrugët apo lavazhet duke mos paguar asnjë qindarkë”, tha Veliaj.
Ai denoncoi dhe një fryrje të stafit të këtij institucioni, që sipas Veliajt është dyfishi i bashkisë së Tiranës.
/ Top Channel
