Tërmeti i 1 qershorit 2019 me epiqendër në fshatin Floq të Korçës dëmtoi 36 shtëpi, ndërkohë që falë masave të marra nga qeveria ato u rindërtuan në kohë rekord. Kryeministri Edi Rama ndau sot përshtypjet e vetë banorëve të Floqit, të cilët tashmë janë futur në shtëpitë e reja.
“Në Floq, ku në një kohë rekord shtëpitë që tërmeti i qershorit të këtij viti i rrënoi, u ngritën nga e para. U premtuam që dimri do t’i gjente në shtëpitë e tyre, në një dëshmi pak minutëshe mund ta shihni e dëgjoni nga vetë banorët se ne bëjmë çfarë themi dhe themi çfarë bëjmë. Super punë. Mirënjohje ekipeve që punuan ditë e natë”, tha Rama.
Shtëpia e familjes Mullaj u rindërtua për 1 muaj e gjysmë. “E kishim të vjetër dhe e kemi më të mirë. Realizimi i shtëpisë mund të shkojë mbi 30 milionë lekë. Nuk t’i fal njeri 30 milionë lekë. Unë jam i kënaqur nga të tërë”, tha kryefamiljari. Ndërsa shtëpia e familjes Bekolli u rindërtua brenda 50 ditëve. “Ne jemi shumë të kënaqur. Shtëpia na është zgjeruar. Na e ngritën dhe na e bënë shtëpinë të re”, thotë gjyshja e kësaj familje.
Shtëpia e familjes Metaj u ndërtua për 25 ditë. “Kisha vetëm një dhomë dhe ishte thuajse e pabanueshme. Tani janë dy dhoma, korridor, banjo brenda dhe sallon i madh”, tha zonja e kësaj shtëpie. Ndërkohë banesa e familjes Pelivani po rindërtohet dhe kompania ka punësuar edhe vetë kryefamiljarin.
Në shumicën e banesave të dëmtuara nga tërmeti në fshatin Floq punimet kanë përfunduar, ndërsa janë drejt përfundimit edhe në banesat e fundit brenda afatit të përcaktuar.
