Maria Ceni është maturante në gjimnazin “Qemal Stafa”, e cila është dakort me mendimin e Ministrisë së Arsimit për kthimin e maturantëve në shkollë nga data 18 maj-5 qershor, por mendon se do të ishte mirë që të shkonin në shkollë disa ditë më herët, në mënyrë që të mbushnin boshllëqet e krijuara gjate periudhës së pandemisë Covid-19 por edhe tërmetit.
“Ne maturantët duhet të vijmë përsëri në shkollë për të bërë konsultime, për të mbushur ato boshllëqe që kemi sidomos nga mësimi online në këtë periudhë në këtë kohë pandemie, por në fakt ne kemi dhe boshllëqe të tjera që nuk arritëm dot t’i mbushnim që nga koha e tërmetit. Duhet thënë në fakt që ky vit ka pasur goxha faktor negativ që kanë ndikuar në përgatitjen tonë. Mu duk goxha me vend fakti që ne do të kthehemi në shkollë, por ndoshta 14 ditë nuk janë të mjaftueshme për të mbushur këto boshllëqe për të cilat unë fola. Për mendimin tim në fakt do të ishte mirë qe në të shkonim në shkollë edhe disa ditë më herët, që konsultimi që ne do bëjmë për provimet që do japim në qershor të jetë më i gjatë dhe ne të përgatitemi jo vetëm nga ana e dijes por dhe nga ana psikologjike.
Në fakt ndihemi paksa të frikësuar që do rikthehemi në shkollë në këtë periudhë. Duke marrë parasysh vetëm shkollën tonë që ka gati 11 klasa të 12-ta, një numër mesatar nxënësish 30 apo 35, janë shumë veta të cilët do frekuentojnë një institucion, gjë e cila sjell që të rritet edhe shkalla e përqindjes që ne mund të infektohemi. Mjafton një person për të infektuar një klasë po themi në rast se nuk do të respektohen masat që janë vendosur. Nuk mendoj se të gjithë ne jemi shumë të sigurt. Nëse deri dje përpara kësaj situate, përpara tërmetit në fakt ishim një herë të frikësuar, me tërmetin u bëmë dy dhe tashmë me Covid-19 që qëndruam kaq kohë në shtëpi të mbyllur dhe me këtë proces të mësuari mund të jemi gati 15 herë më të frikësuar, pasi sjell një pasiguri të madhe tek ne dhe mendoj se jo të gjithë do të kenë mundësi që ta shfaqin veten maksimalisht në këto provime”, u shpreh maturantja.
/e.rr
