Vrasja e 23-vjeçares Eglantina Buci është kthyer sërish në skenë pasi dy të dyshuarit për vrasjen e saj babai dhe vëllai, Shkëlzen Buci dhe Faik Buci u ballafaquan dje në gjykatë me dëshmitarin e mbrojtur të drejtësisë personi i identifikuar me iniciale M. T. Sipas burimeve, ky i fundit ka dëshmuar ndaj Shkëlzen Bucit, lidhur me atentatin ndaj Mishel Prelës disa vite më parë, duke thënë se ishte paguar nga Buci për të ndjekur itinerarin e aktorit.
Gjithashtu, dëshmia e M.T. duket deçizive në këtë çështje pasi ai pretendon se Buci e vrau motrën në sy të tij. Kujtojmë se në 8 shtator të këtij viti Gjykata e Tiranës vendosi masën e sigurisë “Arrest me burg”, ndërsa gjatë seancës babë e bir, mësohet të kenë mohuar akuzën për vrasjen e 23-vjeçares Eglantina Buçi, me pretendimin se vajza është gjallë dhe punon si prostitutë në Turqi. Ndërsa dëshmia e një personi të tretë, i cili mësohet të ketë qenë dëshmitar në këtë ngjarje, ka fundosur dy të akuzuarit Faik dhe Shkëlzen Buci. Ky person njihet si mik i të akuzuarit Shkëlzen Buci, i cili ka zbuluar detajet tronditëse që në 2017-ën. Gjatë këtij viti ai ka qenë i arrestuar për një ngjarje tjetër, dhe pas dëshmisë mësohet të ketë bërë deklarime edhe për krimin makabër të kryer nga Shkëlzeni. Përpara hetuesve ai ka treguar detajet e vrasjes, si është kontaktuar me Shkëlzenin dhe babain e tij Faikun. Referuar dëshmisë së tij, mësohet se vrasja e 23-vjeçares në 2012 është kryer nga i vëllai Shkëlzen Buçi me urdhër të babait Faik Buci.
“Jam kontaktuar nga Faik Buci dhe Shkëlzeni që të vendos kontakt me Eglantinën, pasi ajo ishte larguar nga shtëpia. Pas disa kontaktesh vetë Shkëlzeni e takon motrën. Pas disa kafesh ai kishte marrë Eglantinën në makinë dhe pasi më takoi edhe mua më mori me vete. Kur po lëviznim me makinë, Shkëlzeni i ka thënë Eglantinës që meqë rregulluam marrëdhëniet do pimë një kafe. Në momentin që morëm rrugën për në Malin me Gropa, Eglantina e kuptoi se diçka nuk shkonte dhe filloi të shqetësohej. Kur shkuam aty ai e qëlloi atë me një plumb në kokë. Më pas ka marrë babin Faikun dhe i ka thënë se ajo punë u mbyll”, tha miku i Shkëlzenit.
Ngjarja
Vrasja makabër e lënë në hije plot 8 vjet nga vrasja e 23-vjeçares Eglantina Buçi, është zbardhur nga policia dhe grupet hetimore në Tiranë, pas gjetjes të disa pjesë skeleti të groposura në Malin me Gropa. Të dyshuarit kryesorë për këtë ngjarje janë babai Faik Buçi dhe vëllai Shkëlzen Buçi. Ndërsa, shkak i këtij krimi makabër të lënë në hije që në 2012, mësohet të ketë qenë bashkëjetesa e saj pa pëlqimin e prindërve me një djalë. Referuar hetimeve nga policia dhe Prokuroria e Tiranës, babë e bir pasi e kanë vrarë të bijën, trupin e pajetë të 23-vjeçares e kanë groposur në mal, duke u munduar të fshehin të vërtetat e këtij akti të frikshëm. Ndërkohë dinamika e vërtetë e ngjarjes është zbardhur nga një person i tretë, mik i Shkëlzen Bucit, i cili pretendon se ka qenë dëshmitar në ekzekutimin e 23-vjeçares. Referuar dëshmisë së tij, mësohet se fillimisht ai është kontaktuar nga babë e bir për t’u vënë në kontakt me viktimën pasi prej kohësh ajo ishte larguar nga banesa duke mos pasur asnjë komunikim me ta. Por pas disa kërkimesh Shkëlzeni kishte arritur vetë të takonte të motrën dhe pasi ishte takuar kishte qenë me mikun e tij. Mësohet se, ata janë drejtuar në Malin me Gropa dhe pasi të dy kanë arritur në vendin ku u gjet dhe trupi i groposur, Shkëlzeni ka qëlluar të motrën me një plumb në kokë duke e lënë të vdekur.
/a.r
