Pas disa javësh hetime intensive me metoda proaktive, Drejtoria Vendore e Policisë Elbasan finalizoi operacionin policor të koduar “Transit”, i cili u zhvillua nga Seksioni për Hetimin e Trafiqeve, në bashkëpunim me Seksionin për Mbështetjen Operacionale të Hetimit, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Elbasan. Sipas njoftimit të policisë, hetimet treguan se në dy apartamente në qytetin e Elbasanit ushtrohej prostitucion nga shtetase të huaja, të cilat kontaktonin klientët përmes faqeve online.
Gjatë veprimeve të ndërmarra nga autoritetet, u arrestuan në flagrancë tre shtetase kolumbiane: D. P., 20 vjeçe, D. M., 18 vjeçe, dhe J. D., 34 vjeçe, të cilat policia identifikoi si kryesuese të veprës penale “Prostitucioni”. Në njoftimin zyrtar thuhet gjithashtu se pronarja e apartamentit, M. J., 34 vjeçe, do të procedohet penalisht në gjendje të lirë për veprën “Mbajtja e ambienteve për prostitucion”. Policia thekson se ky aktivitet i paligjshëm u dokumentua përmes metodave speciale dhe bashkëpunimit të ngushtë me Prokurorinë.
