Tregjet globale po përballen me rritje të ndjeshme të çmimeve të hidrokarbureve, si pasojë e konfliktit në Lindjen e Mesme, duke shtyrë gjithnjë e më shumë drejtues automjetesh të kërkojnë alternativa ndaj motorëve me djegie të brendshme.
Sipas agjencisë Reuters, shitjet e makinave plotësisht elektrike në tregjet kryesore evropiane u rritën me gati një të tretën gjatë tremujorit të parë të vitit 2026. Regjistrimet e automjeteve të reja elektrike me bateri (BEV) arritën në rreth 560,000 mjete në periudhën janar-mars, duke shënuar një rritje prej 29.4% krahasuar me një vit më parë. Vetëm në muajin mars, mbi 240,000 automjete të tilla u regjistruan në 15 tregje evropiane.
Pesë tregjet më të mëdha të Bashkimit Evropian, Gjermania, Franca, Spanja, Italia dhe Polonia kanë regjistruar një rritje prej më shumë se 40% në shitjet e automjeteve elektrike vetëm gjatë këtij viti. Edhe në Britani, tregu i dytë më i madh në Evropë, shitjet u rritën me 12.8%, ku makinat elektrike përbënin 22.5% të të gjitha makinave të reja.
Edhe Shqipëria po shënon përparime të dukshme në rritjen e flotës së automjeteve elektrike. Sipas të dhënave zyrtare të Drejtorisë së Përgjithshme të Transportit Rrugor, vetëm gjatë periudhës janar-mars 2026, mbi 2,964 mjete plotësisht elektrike janë regjistruar për herë të parë, ose 202% më shumë krahasuar me të njëjtën periudhë të vitit 2025. Po ashtu, rreth 82% e autoveturave të reja të regjistruara janë hibride të rinovueshme, duke shënuar një rritje prej 14%.
Këto shifra tregojnë se tranzicioni drejt automjeteve më të pastra dhe efikase po përshpejtohet, si në Evropë ashtu edhe në Shqipëri, duke i dhënë një shtytje të re tregut të infrastrukturës së karikimit dhe teknologjive të gjelbra.
