Zbulohet struktura e Prokurorisë Speciale Antikorrupsion-SPAK që pritet të krijohet në ditët e ardhshme.
Janë vetëm 10 prokurorë që do të punojnë në institucionin që sipas Kushtetutës së Re ka fuqi të mëdha dhe do të ketë si funksion kapjen dhe dërgimin para gjykatës së zyrtarëve që kanë abuzuar me pushtetin.
Nga 10 prokurorët e SPAK, njëri do të jetë kreu i institucionit, kurse 9 të tjerë do të kenë punë specifike në strukturën që pritet të ngrihet sa më shpejt.
Ndarja e punës do të bëhet sipas një radhe që siguron sa më shumë dosje hetimore të hapura brenda një kohë shumë të shkurtër.
Siç mësohet, prokurorët e SPAK do të trajnohen për gjetjen e parave të fshehura në bankat e huaja, por edhe në investime të kryera e të regjistruara me emra të tjerë.
Në një dokument të publikuar nga misioni EURALIUS, jepen detaje mbi koston që do ketë reforma, por dhe detajohen rrugët që do ndiqen për zbatimin e reformës. Sa i takon luftës ndaj korrupsionit, do shpenzohen rreth 3 milionë euro për ngritjen e SPAK dhe pajisjen e saj me aparatura speciale, përmes të cilave do zbulohen aferat dhe do të gjenden paratë e pista.
Sipas planit, sapo SPAK të ngrihet, rreth 1.2 milionë euro do të shkojnë kryesisht për pajisje, por ky proces do të vijojë deri në vitin 2020 kur do të bëhet kompletimi i të gjitha materialeve. Fillimisht do shpenzohen 200 mijë euro për të blerë aparaturat e nevojshme, ndërsa 1 milion euro do shkojnë për ngritjen e një sistemi elektronik, ku do të hidhen të dhënat për çdo zyrtar dhe ku prokurorët do kenë akses aty. Por është planifikuar që deri në 2020 çdo vit të ketë shpenzime nga 200 mijë euro për pajisje në ndihmë të prokurorëve të SPAK.
Një element tjetër i veçantë për SPAK janë dhe trajnimet. Sipas dokumentit, 110 mijë euro do shkojnë për të trajnuar prokurorët për arrestime VIP, duke përfshirë përgjimet, gjetjen e parave të pista, etj. Nga ana tjetër, një rëndësi e madhe do i jepet policisë gjyqësore. Për ta do shpenzohen 170 mijë euro dhe do ketë trajnime të vazhdueshme, me qëllim që të asistojnë prokurorët e SPAK.
Një ekip i trajnuar prej rreth 20 bashkëpunëtorësh do të punojnë ngushtë me prokurorët specialë.
Ndihmësit do të jenë ose financierë të sprovuar transfertash bankare, ose IT të njohur që mund të zbërthejnë kodet e vendosura në llogaritë bankare sekrete.
Prokuroria Speciale do të ketë lidhje direkte me FBI-në dhe shërbimet e specializuara të Europës në mënyrë që të arrihet zbulimi dhe kapja e abuzuesve të pushtetit.
Tesheshi.com/d.i.
