Deputeti i PS-së, Taulant Balla i është përgjigjur thirrjes së Luan Ramës së LSI-së, i cili kërkoi sot që PD dhe PS të bashkohen dhe të bëjnë reformën zgjedhore. Balla i kujton Ramës se ai është pjesë e mazhorancës dhe se LSI dhe PS janë bashkë me qëndrime të njëjta për reformën zgjedhore.
Ai i sugjeron Luan Ramës se është e kotë që të bëjë edhe arbitrin edhe lojtarin.
POSTIMI
I them mikut tim Luan Rama qe barazlargimi i tij, duke fajesuar po njesoj edhe PS edhe PD per Reformen Zgjedhore eshte i padrejte, per te mos thene me shume! Luan Rama duhet ta dije se PS dhe LSI jane bashke ne Komisionin e Reformes Zgjedhore dhe kane qendrime plotesisht te dakordesuara mbi rekomandimet e OSBE/ODHIR-it.
Po ashtu Luan Rama me siguri e di qe kemi nje muaj qe presim qe PD te behet pjese konstruktive e punes se komisionit per ta mbyllur reformen.
Prandaj Luan Rama le t’i beje thirrje PD sic i bejme edhe ne po ashtu, sepse roli i dyfishte i skuadres dhe arbitrit nuk ka me asnje kuptim! PS dhe LSI kane bere nje pune shume serioze ne komision dhe respekti per kete skuader eshte minimumi qe duhet te tregoje miku Luan Rama pavaresisht se mund t’i kete rene te beje pjesen e arbitrit!
THIRRJA E LUAN RAMES
Zv/kryetari i LSI, Luan Rama ka dalë sot në një konferencë për mediat ku i ka kërkuar dy partive kryesore në vend që të bashkëpunojnë për reformën zgjedhore.
Rama foli në emër të LSI-së dhe kërkoi bashkëpunim mes dy forcave kundërshtare që të kalojë sa më shpejt reforma zgjedhore, shkruan panorama.
“Në emër të LSI, edhe një herë i ftoj forcat politike që përfaqësohen në Kuvend në mënyrë të veçantë PD dhe PS që të demonstrojnë angazhimin e tyre real në mënyrë që të bëjnë të mundur reformën zgjedhore.
LSI është e gatshme të bashkëpunojë dhe të ofrojë kontributin e vet për të bërë të mundur konsensusin e nevojshëm që edhe reforma zgjedhore të bëhen me konsensusin e të gjitha palëve duke dëshmuar përgjegjshmëri përballë qytetarëve”, tha ai.
