Drejtori i Institutit të Studimeve Politike Afrim Krasniqi beson se vetëm implementimi i paketës me 9 propozimet e Gjermanisë është mënyra e vetme për të zgjidhur krizën politike.
Në një intervistë për ‘’Ora News’’, politologu i njohur theksoi se nuk mund të ketë zgjidhje të krizës duke firmosur një marrëveshje jotransparente midis PD-së dhe PS-së duke patur parasysh se ka 13 precedentë të mëparshëm të dështuar.
‘’Çdo marrëveshje e bërë jashtë transparencës publike, edhe duke përdorur alibinë që aty ka një ekspert nga OSBE, amerikanët apo BE, personalisht është marrëveshja e 14-ë midis dy partive të mëdha dhe siç kanë dështuar 13 të parat do të dështojë dhe kjo. Shqipëria ka vetëm 90 ditë kohë për të kthyer përgjigje për këtë reformë (zgjedhore)’’, u shpreh Krasniqi kundër marrëveshjes së mundshme PD-PS.
Për sa i përket sistemit zgjedhor të ri që pritet të dalë nga Reforma Zgjedhore, Krasniqi zgjedh atë proporcional kombëtar me lista të hapura ose atë miks.
‘’Nëse ndryshojmë sistemin duhet të ndryshojmë Kushtetutën e Shqipërisë, neni 64. Për këtë do të duhet minimalisht të merret konsensusi i deputetëve të tjerë në parlament, përfshirë dhe deputetët që kanë zëvendësuar deputetët e opozitës në parlament. Duhet një lloj kurajo për të kaluar vijën e kuqe dhe për të dialoguar me të gjithë’’, foli për ndryshimet kushtetuese për Kodin Zgjedhor Afrim Krasniqi.
Si përfundim, vetëm përmbushja e 9 kushteve të vendosura nga parlamenti i hap rrugë nisjes së negociatave për anëtarësim.
‘’Kemi shkuar në një pikë ku të dy palët duan dialog. Çështja është se secila palë po kërkon çmimin për t’u ulur në dialog. Disa drejtues të opozitës dhe mazhorancës e kanë pranuar që ajo që quhet paketa gjermane është një bazë e mirë për një marrëveshje të re politike në Shqipëri’’, përfundoi drejtuesi i ISP-së Afrim Krasniqi.
