Ministri i Drejtësisë, Ylli Manjani, gjatë një interviste të mërkurën në mbrëmje ne emisionin Opinion në TV Klan foli për pastrimin e sistemit gjyqësor në vend (Vettingu), duke deklaruar se gjyqtarët dhe prokurorët e shtetit shqiptar, do kalojnë në një periudhë rivlerësimi.
Manjani thote se njerezve te drejtesise do t’u rivlerësohet pasuria dhe kjo është arsyeja se pse ata po bëjnë deklarimin e imtësishëm të pasurisë. Si asnjëherë tjetër do t’u vlerësohet figura dhe aftësia profesionale.
Sipas ministrit, vlerësimi i gjyqtarëve dhe prokurorëve, do të realizohet nga juristë, që përbëjnë një strukturë prej 12 personash, pra një komision me 12 vetë, do të jenë katër trupa gjykuese me nga tre anëtarë dhe mbi këtë do jetë një Komision Apelimi, i cili do te jetë pranë Gjykatës Kushtetuese dhe do të shqyrtojë apelimet. Jashtë këtyre do të jenë dy komisionerë që do të flasin në emër të publikut, që edhe këta do të jenë juristë me 15 vite përvojë.
Ministri i Drejtësisë shpjegon se ata gjyqtarë dhe prokurorë që nuk do të dorëzojnë formularin e Vetting-ut, do të shpëtojnë, por do të largohen nga detyra.
Ndërsa nëse ata tentojnë të hyjnë dhe rezultojnë me vepër penale, do të ndiqen penalisht, nenvizoi Manjani.
Në përgjigje të pyetjes se pse SHBA është e përfshirë në strukturën e posaçme antikorrupsion(SPAK-u), ministri i Drejtesise përgjigjet se kjo vjen nga një sërë marrëveshjesh mes qeverisë shqiptare dhe asaj amerikane. Po ashtu SHBA, ka vënë në dispozicion një fond të posaçëm për të ndërtuar këtë skemë. Pra struktura e SPAK do të ndërtohet me paratë e qeverisë amerikane dhe me trajnimin e tyre, tha ai.
Sa i takon veprimtarise se SPAK, ministri u shpreh se kjo strukture ka në qëndër të vëmendjes hetimin e korrupsionit në nivele të larta.
I pyetur për cështjen e Klement Balilit, Manjani përgjijet se ai duhet të ishte arrestuar nga policia. Sipas tij, Balili duhet të arrestohej nga shteti shqiptar për llogari të shtetit grek. “Edhe Prokuroria shqiptare e kishte nën hetim këtë person”, tha ai. /b.d
