Në draftin e ndryshimeve kushtetuese, në një nen ku flitej për hetimin e zyrtarëve të lartë dhe se kush prej tyre mund të hetohej e ndiqej penalisht, nuk rezultonte që të ishin edhe ish ministrat e qeverive të shkuara. Kjo pikë e një neni në draftin e reformës së drejtësi solli një sërë reagimesh dhe publikimesh nëpër mediat online.
Pikërisht për këtë ka reaguar sot Partia Demokratike, duke thënë se ajo nuk ka kërkuar dhe nuk do të pranojë asnjë kufizim për hetimin e korrupsionit qeveritar, qoftë ky i sotshmi apo i djeshmi.
“Partia Demokratike hedh poshtë spekullimet në media, të servirura dhe të orientuara nga Edi Rama, lidhur me reformën në drejtësi, sikur PD po kërkon imunitet për ish-zyrtarët e saj.
Këto janë shpifje të ulëta dhe përpjekje e mjerë e Edi Ramës për të gjetur një armik për reformën në drejtësi, por armik tjetër kjo reformë përveç tij nuk ka.
Partia Demokratike e thekson se është për hetim të plotë të zyrtarëve të lartë, të ish-zyrtarëve të lartë, të çdo funksionari e ish-funksionari, pa asnjë lloj kufizimi kohor apo të çfarëdolloji tjetër.
I vetmi kusht që ka pasur dhe ka Partia Demokratike për reformën në drejtësi është që ajo të mos kapet poltikisht nga Edi Rama, të mos bëhet shtesë dhe alibi e qeverisjes së të tij.
Partia Demokratike mbështet një reformë në drejtësi sipas parimeve e standarteve europiane, që nuk mbron, por lufton pa kompromis krimin dhe korrupsionin pa asnjë dallim apo kufizim.”- shkruhet në njoftim. Javanews/ a.k
