Ministria për Evropën dhe Punët e Jashtme e Shqipërisë ka reaguar sot në 5 maj, duke dënuar sulmet e fundit me raketa dhe dronë të Iranit ndaj Emirateve të Bashkuara Arabe.
Sipas deklaratës, këto sulme përbëjnë një akt agresioni të paprovokuar ndaj infrastrukturës kritike të vendit. MEPJ thekson se objektet energjetike janë vënë në shënjestër në mënyrë të përsëritur dhe të rrezikshme.
Ministria thekson se sulme të tilla rrezikojnë seriozisht stabilitetin në rajonin e Lindjes së Mesme. Në deklaratë thuhet se pasojat e këtyre tensioneve ndikojnë drejtpërdrejt edhe në sigurinë e Evropës. Shqipëria bën thirrje për përmbajtje dhe ulje të menjëhershme të tensioneve. Gjithashtu, kërkohet rikthimi te zgjidhjet diplomatike për të shmangur përshkallëzimin e mëtejshëm të situatës.
Reagimi i MEPJ:
Ministria për Evropën dhe Punët e Jashtme e Republikës së Shqipërisë dënon me forcë sulmet më të fundit me raketa dhe dronë të ndërmarra nga Irani kundër Emirateve të Bashkuara Arabe, të cilat u vunë sërish në shënjestër të një agresioni të egër. Këto goditje të paprovokuara ndaj infrastrukturës kritike, përfshirë objektet energjetike, përbëjnë një shkelje të qartë të sovranitetit dhe të së drejtës ndërkombëtare.
Shqipëria qëndron në solidaritet të plotë dhe të palëkundur me #EBA, udhëheqjen e saj dhe popullin e Emirateve, si edhe me partnerët tanë në të gjithë Lindjen e Mesme.
Sulme të tilla janë të papranueshme dhe rrezikojnë më tej stabilitetin rajonal. Siguria në Lindjen e Mesme ka implikime të drejtpërdrejta për #Evropën dhe më gjerë. Prandaj, bëjmë thirrje për përmbajtje, ulje tensionesh dhe një angazhim të ripërtërirë ndaj zgjidhjeve diplomatike.
Shqipëria do të vijojë të punojë ngushtë me partnerët e saj për të promovuar stabilitetin, paqen dhe sigurinë në rajon.
