Nga Mero Baze
Arrestimi i biznesmenit që trafikoi 613 kg kokainë nga Kolumbia në Shqipëri, ka vendosur heshtjen në kampin opozitar në Shqipëri dhe ka filluar të prodhoj një farë “qesëndie” prej tyre për “peshkun e madh”, edhe pse për javë të tëra, Sali Berisha dhe shtypi afër tij, e ka paraqitur rastin, si një skandal të lidhru me qeverinë.
Të vetmit që ndjehen të lehtësuar nga arrestimi janë ambasada amerikane dhe qeveria shqiptare, e cila ka pranuar se arrestimi është bërë në bashkëpunim me agjensitë e zbulimit ndërkombëtar.
Biles Ambasada amerikane, si për ironi, e ka shoqëruar arrestimin dhe me një foto satirike, që e paraqet Çekaj si “peshk I madh” .
Por çfarë e bën kaq të bujshëm lajmin e arrestimit të Çekaj?
Arrestimi mund të rindërtoj historinë e kësaj linje trafiku, e cila është kryer dukshëm përmes një skeme, e cila ka përdour si garante të mos dënimit final, prokurorinë. Nga pikpamja formale juridike, ngarkesa e porositur e bananeve e tipit CIF, ku përgjegjësia deri në portin e Durrësit është e porositësit, ka qenë skema që ka shpëtuar nga penalizimi të njëjtin biznesmen vite më parë, kur në kontenierin e tij është gjetur sërish kokainë. Prokuroria e ka lënë të lire, duke e justifikuar se ai nuk ka faj, pasi ka porositur banane.
Nën këtë skemë të garancisë ligjore, nëse prokuroria nuk heton më tej dhe nuk gërmon në gjurmët e rrugës së trafikut, ky biznes bëhet plotësisht I suksesëshëm pa pasur nevojë të kesh lidhje me shefa police apo çdo kënd tjetër, pasi ke të sigurt shfajësimin formal që ngarkesa nuk është e jotja.
Për këtë arsye arrestimi i Çekajt dhe hetimi i thelluar ndaj kësaj linje trafiku, mund të prodhoj një pamje të re të rolit që ka luajtur prokuroria shqiptare si “garante e heshtur” e kësaj skeme trafiku, ku nëse droga kalon pa u kapur është fitore, por nëse kapet, nuk është fundi I botës, pasi nuk ke faj ligjërisht.
Edhe pse kompania ka një precedent të mëparshëm në këtë histori, për më shumë se dy vite ndaj saj nuk është bërë asnjë hetim dhe kapja e drogës është bërë fal skanerit të doganës në Durrës, dhe sinjaleve ndërkombëtare për dyshimet mbi ngarkesën.
Është kjo arsyeja që arrestimi i sotëm në Gjermani ka ngjallur entuziazëm tek ambasada e SHBA dhe qeveria në Tiranë, dhe akoma më tepër pritshmëria që në rrjet ka rënë një peshk I madh, që mund ta çoj drejtësinë drejt garantëve të sigurt të këtij trafiku.
Është aq reale kjo pritshmëri, sa ndjehet edhe në “qesëndinë” e opozitarëve, që kanë filluar ta quajnë rastin e Maminasit dhe vet Çekaj një “peshk i vogël”. Me sa duket i arrestuari tjetër në Spanjë me një tonë, i ka hutuar. Dhe s’kanë faj, se u duket “sypeshkaqen”.
