Procedimet për korrupsion kanë pësuar ulje krahasuar me një vit me parë. Ky është konkluzioni i Prokurorisë që ka paraqitur në Kuvend raportin e punës 1 vjeçare të saj.
Sipas organit qendror të akuzës, gjatë vitit 2016 ka një ulje prej 24,4 % të numrit të procedimeve të regjistruara për veprat penale të korrupsionit, në krahasim me vitin 2015. Ulje kanë pësuar edhe numri i të pandehurve të regjistruar përkundrejt këtij totali në vitin 2015 prej 24,5 %.
Gjithashtu gjatë vitit 2016 janë regjistruar 2 procedime për veprën penale të “Korrupsioni aktiv i funksionarëve të lartë shtetërorë ose të zgjedhurve vendorë”, dhe 11 procedime penale për nenin 260 të Kodit Penal “Korrupsioni pasiv i funksionarëve të lartë shtetërorë ose të zgjedhurve vendorë”, kundrejt 2 procedimeve të regjistruara në vitin 2015 për këtë vepër.
Gjithashtu në raport vihet re se për vitin 2016 për veprën penale të “Korrupsioni aktiv i gjyqtarëve, prokurorëve dhe funksionarëve të tjerë të drejtësisë”, organi i Prokurorisë ka regjistruar 3 procedime penale me 4 të pandehur, ndërkohë që në vitin 2015 rezultojnë të regjistruar 7 procedime penale.
Gjatë këtij viti janë dërguar për gjykim 2 procedime penale me 8 të pandehur dhe janë dënuar nga gjykata 8 të pandehur. Ndërsa për veprën penale ”Korrupsioni pasiv i gjyqtarëve, prokurorëve dhe funksionarëve të tjerë të drejtësisë”, ka regjistruar 18 procedime penale me 10 të pandehur, ndërkohë që në vitin 2015 janë regjistruar 25 procedime me 9 të pandehur./oranews
a.ç
