Në luftën ndaj informalitetit, Kryeministri Edi Rama është i vendosur t’i shkojë deri në fund, duke mos kursyer as administratën. Shefi i qeverisë shqiptare ka lëshuar një urdhër ku paralajmëron 88 mijë e 500 punonjësit e administratës shtetërore për penalitete deri në largim nga puna, nëse kapen pa marrë kuponin tatimor.
Në këtë urdhër specifikohet se Drejtoria e Tatimeve, çdo tre muaj duhet të hartojë listën e personave që ka gjobitur për mospajisje me kuponin tatimor. Më pas dokumenti i çohet për verifikim Departamentit të Administratës Publike, i cili konstaton nëse mes të ndëshkuarve ka apo jo nëpunës civilë.
Siç raporton “VizionPlus”, urdhri fillimisht i është dërguar për zbatim Ministrisë së Financave dhe më pas skema e ndjekur prej saj në zbatim do të ndiqet edhe në të gjitha institucionet e tjera shtetërore.
Struktura përkatëse e burimeve njerëzore i raporton me shkrim eprorit direkt të nëpunësit, ndaj të cilit është marrë masa e gjobës nga administrata tatimore. Dënimi me gjobë i nëpunësve për mosmarrje të kuponit tatimor sipas nenit 125 të ligjit nr.9920, datë 19.05.2008, “Për procedurat tatimore”, përbën shkak për fillimin e procedurave disiplinore ndaj nëpunësit përgjegjës.
Këto procedura disiplinore shkojnë deri në largimin nga puna të nëpunësit të administratës nëse ai është gjobitur në mënyrë të përsëritur nga tatimet për faktin se nuk ka marrë kuponin.
