Raketa Starship e gjeneratës së ardhshme të SpaceX hyri në orbitë për herë të parë të hënën, më 28 shtator, pavarësisht fikjes së njërit prej motorëve gjatë fluturimit.
Misioni shënon një moment të rëndësishëm për kompaninë e Elon Musk, pasi Starship arriti të vendosë në orbitë grupin e parë të satelitëve të rinj Starlink.
Pas rreth tre orësh fluturim, mjeti u ul në ujërat e Oqeanit Paqësor, në perëndim të Kilit, ku shpërtheu gjatë përfundimit të misionit. Fluturimi ishte planifikuar fillimisht të zgjaste rreth 10 orë, por u shkurtua për shkak të problemit me motorin.
Sipas Reuters, mjeti pa pilot, rreth 40 kate i lartë, përbëhet nga raketa përforcuese Super Heavy dhe pjesa e sipërme Starship. Ai u nis nga baza Starbase e SpaceX pranë Brownsville, në Teksas.
Super Heavy e ngriti Starship në hapësirë dhe më pas u kthye drejt Gjirit të Meksikës për një ulje të kontrolluar me motorë. Ndërkohë, pjesa e sipërme vazhdoi fluturimin drejt orbitës.
Rreth dy milionë përdorues të platformës X ndoqën transmetimin e drejtpërdrejtë të SpaceX. Kompania publikoi gjithashtu pamje nga hapësira gjatë misionit.
Problemet nisën pasi Starship kishte arritur në hapësirë, kur njëri prej tre motorëve kryesorë u fik më herët nga sa ishte planifikuar.
Fillimisht, zëdhënësi i SpaceX, Dan Huot, tha gjatë transmetimit se anija nuk do të ishte në gjendje të arrinte orbitën. Megjithatë, pas një vlerësimi të ri nga inxhinierët, ekipi vendosi të tentonte ndezjen e motorit për të kryer manovrën e nevojshme.
Starship arriti të përfundonte me sukses manovrën dhe hyri në orbitë.
Pas kësaj, anija nisi të vendoste njëri pas tjetrit 26 satelitë Starlink të gjeneratës së re, në një lartësi prej rreth 269 kilometrash.
Misioni pritej të përfshinte gjashtë orbita rreth Tokës përpara se Starship të kthehej në atmosferë.
Misioni i së hënës konsiderohet teknikisht fluturimi i 14-të testues i Starship, por ishte i pari që transportoi një ngarkesë orbitale, konkretisht satelitët e rinj Starlink V3.
Sipas SpaceX, satelitët V3 mund të përpunojnë deri në 10 herë më shumë të dhëna sesa satelitët V2. Kompania synon që, pasi Starship të hyjë në përdorim të rregullt, të lëshojë rreth 60 satelitë V3 në një mision të vetëm.
Starship është projektuar për të mundësuar lëshime më të shpeshta të satelitëve Starlink, por edhe për të transportuar në të ardhmen misione të NASA-s drejt Hënës. Arritja në orbitë ishte një objektiv i vonuar për SpaceX. Që nga viti 2023, 13 fluturimet e mëparshme testuese të Starship kishin mbetur në fazën suborbitale.
Elon Musk kishte parashikuar më herët që Starship të arrinte orbitën që në vitin 2022 dhe që lëshimet e satelitëve të nisnin në vitin 2023. Programi Starship është gjithashtu pjesë e rëndësishme e programit Artemis të NASA-s, i cili synon rikthimin e astronautëve në sipërfaqen e Hënës dhe krijimin e një pranie afatgjatë njerëzore atje, me synim eksplorimet e ardhshme drejt Marsit.
Splashdown confirmed. Congratulations to the entire SpaceX team on the first orbital flight of Starship! https://t.co/urjmiwnvNl
— SpaceX (@SpaceX) September 28, 2026
