Gjatë mitingut elektoral në Vorë paraditen e sotme, Kryeministri Edi Rama ka sulmuar LSI-në dhe i është përgjigjur akuzave të saj.
Gjatë fjalës së tij, Rama u shpreh se nuk ka luftë dhe asgjë personale me asnjë parti politike. Sipas tij, gara e Partisë Socialiste është për të reformuar administratën shtetërore.
Duke folur për koalicionet, Rama nënkuptoi LSI-në kur tha se duhet të krenohen me punët që ka bërë kjo qeveri, pavarësisht se ata vetëm kanë votuar në Parlament dhe s’kanë bërë asnjë reformë.
“Unë nuk kam dalë në këtë fushatë për luftë, kam dalë për garë po jo garë me të tjerët. Unë nuk e di çfarë kanë, janë çmendur, bërtasin, çirren, as po ju thotë njeri gjysëm llafi. Pse i shqetëson kaq shumë vetëm një gjë, duam të bëjmë shtet, duam të bëjmë administratë. Pastaj vijnë në Tiranë thonë ku është tepsia. Ore jemi këtu për njerëzit, duhet të regjistrojmë tokat, ata na kanë votuar për këtë punë.
Jo, unë dua hipotekën, patentat, midhjet, oktapodin, burgun, vjen tjetri thotë dua pastruesen. Ai ka pastrueset e veta. Si mund të bëhet shtet kështu, dhe kjo s’është personale. Unë nuk them që e ka fajin ajo parti apo kjo parti. Dhe ne me koalicionin kemi bërë punë shumë të mira. Pavarësisht se punët i kemi bërë vetëm ne, ata na kanë dhënë votën se mendjen tek tepsia. Por të dalin të krenohen me punët që kemi bërë”, u shpreh Kryeministri Edi Rama.
Sipas Ramës, qeveria ka legalizuar falas objektet pa leje të qytetarëve, por ata nuk e regjistrojnë dot pronën pasi Hipoteka, e drejtuar nga një parti tjetër, siç tha ai, i mban peng.
Pronat e paregjistruara në Hipoteka, premtoi Rama, qeveria do t’i kthejë në titull pronësie brenda vitit.
“Me votat tuaja vijnë në Tiranë dhe thonë tepsia, ku është tepsia. Nëse ne do kishim fuqinë nga njerëzitm, nuk do kishim sot këtu në Vorë, 3 mijë njerëz, familje, që kanë marrë lejen e elgalizimit dhe nuk marrin dot hipotekën. S’do kishim këtu një zonë kadastrale të paregjistruar. Ju shisni toka dhe ato nuk janë të regjistruara. Nëse do na jepni besimin, do kemi një sistem tjetër, të përqendruar në agjenci të pronës së patundshme, ku do jenë bashkë komisioni i kthimit të pronave, hipoteka dhe ALUIZNI dhe nuk do ketë më histori ta jep njëri, s’ta lëshon tjetri, ta mban peng një tjetër. Se e kanë ndarë votën në tre pjesë, jepja njërit hipotekën, e mban partia e tij, jepja ALUIZNI-n, e mban partia e tij. Na ka qëlluar që Lame është pa parti dhe ua ka dhënë të gjithëve. Ta ndajmë këtë.
Ne u japim legalizimet dhe nuk e regjistrojnë dot pronën në Hipotekë, sepse hipotekën e ka dikush tjetër. Ne do ua bëjmë titull pronësie, 40 mijë legalizimet që nuk i regjistroni në hipoteka, brenda vitit. Votoni PS-në dhe do marrë fund historia e regjistrimit të pronës. Çdo pronë do regjistrohet dhe çdo titull pronësie do i dorëzohet pronarit”, tha Rama./a.ç
