Kryeministri Edi Rama deklaroi të enjten se Shqipëria po merr kthesën e po hyn në rrugën e rimëkëmbjes ekonomike, sociale e kulturore falë reformave që ne po bëjmë.
Shefi i qeverisë, teksa shpërndau disa leje legalizimi për qytetarët e Tiranës tha se ALUIZNI ka bërë përgjatë një viti , atë që qeverisja e djathtë nuk e bëri në 8 vite të marra së bashku.
“Për një vit shpërndamë 25 mijë leje legalzimi, ndërsa qeverisja e shkuar në 8 vite shpërndau vetëm 27 mijë e 300 leje legalizimi”, deklaroi Rama.
Sipas tij, janë përditësuar në një vit 50 mijë dosje më shumë se sa qeverisja e djathtë përditësoi në 5 vite të marra së bashku.
Kreu i qeverisë duke theksuar se ky proces po realizohet falas, u shpreh se qeveria e kaluar e tërhoqi zvarrë këtë proces, duke e lënë ALUIZNI-n si “një magazinë pa inventar”. Rama foli edhe për rreth 60 mijë ndërtime pa leje, për të cilat ai informoi se për këto ndërtime do të ndërmarrim një hap ligjor në Parlament dhe do të nisim procesin e legalizimit. Sërish, shefi i qeverisë rikujtoi se nuk do të lejohen ndërtime pa leje.
Duke u ndalur në refomat e qeverisë, Kryeministri Rama theksoi se janë bërë hapa të rëndësishëm në drejtim të përmirësimit të shërbimit shëndetësor, uljen e nivelit të humbjeve të energjisë dhe rritjen e arkëtimeve, ashu sikurse informoi se në 4 muajt e parë të vitit është shënuar numri më i ulët i vrasjeve në historinë 20 vjeçare. Për këtë, Rama tha se synojmë që deri në fund të mandatit të arrijmë në mesataren europiane si dhe nën mesataren rajonale
ATSH/ATA
