Kryeministri Edi Rama ka deklaruar se Shqipëria meriton hapjen e negociatave për anëtarësimin në Bashkimin Evropian. Në një konferencë të përbashkët me Komisionerin për Zgjerim, Johannes Hahn, Rama tha se tashmë ka nisur procesi i Vettingut në vendin tonë, një element ky i kërkuar nga BE për hapjen e negociatave.
Më tej, ai theksoi se ka diskutuar me Hahn për luftën kundër kanabisit dhe krimit, teksa tha se pas fazës së parë të përmbyllur me sukses, qeveria nis luftën në fazën e dytë me Task-Forcën Speciale të Policisë.
“Kjo vizitë vjen në një moment të rëndësishëm, sepse pas negocimit të BE për hapjen e negociatave, rikujtoj të zbatimit të procesit të Vettingut, Shqipëria e ka filluar procesin e Vettingut. Me Hahn diskutuam hapat që duhet të ndërmarrim së bashku në funksion t konsolidimit të Shqipërisë në raport me shtetet anëtare, duke vënë në tryezën e KE një raport solid që konfirmon vazhdimiësinë e progresit të bërë që në vitin e shkuar. Diskutuam për suksesin e qartë të lufts kundër kultivimit dhe trafikimit të kanabisit, një suksese i mishëruar në raportin e dalë pas monitorimit të qenësishëm të Guarda di Finanza dhe i konsideruar si përmbyllja e fazës së parë. Lufta nis në fazën e dytë, për të cilën ndamë me Hahn objektivat dhe ambicien tonë, si dhe hapat për t’ia dalë me sukses me Task Forcën Speciale të policisë”, tha Rama.
Më tej, kreu i qeverisë zbuloi dhe një takim që do të zhvillojë me Presidentin e KE, Jean-Claude Juncker, në fillim të dhjetorit.
“Presidentin Juncker do ta takoj në fillim të dhjetorit, pas ftesës së marrë ditën e djeshme. Neve na takon të provojmë progresin me fakte, por nuk jemi vetëm sepse kemi mbështetje të qartë nga BE”, shtoi shefi i qeverisë.
Komisioneri për Zgjerimin, Johannes Hahn deklaroi në konferencën e përbashkët për shtyp me Kryeministrin Edi Rama se Shqipëria është në rrugën e duhur.
“Në vlerësimin tonë Shqipëria është në rrugën e duhur dhe aspirata europiane duhet të jetë një objektiv kombëtar që mbështetet nga të gjithë elementët, partitë politike, shoqëria civile e madje edhe media”, deklaroi Komisioneri.
Hahn përmendi edhe problematikat kryesore që shqetësojnë BE-në. Ai tha se ka patur arritje në luftën kundër kanabisit, e po ashtu përmendi edhe uljen e numrit të azilkërkuesve. Komisioneri përmendi Vettingun dhe pritshmëritë që BE ka tek ky proces.
Komisioneri deklaroi se vitin e ardhshëm do të organizohet një Samit për Ballkanit Perëndimor në Bullgari, 15 vite pas atij të Selanikut.
“Kjo tregon angazhimin e Bashkimit Europian për të ardhmen europiane të vendeve të Ballkanit Perëndimor”, u shpreh ai.
a.ç
