Në episodin e fundit të “Flasim” për 2025, Kryeministri Edi Rama ka shpërndarë një mesazh për Shqipërinë dhe sfidat e saj. Ai ka theksuar arritjet që ka pësuar vendi gjatë këtij viti, ndërsa nuk la pa përmendur edhe kritikat duke i konsideruar si “700 tenxheret politike mediatike” që përpiqen të dëmtojnë imazhin e Shqipërisë.
Rama theksoi se pavarësisht zhurmës mediatike dhe politizimeve, vendi ka bërë hapa të mëdhenj përpara sidomos në negociatat për anëtarësimin e vendit në BE.
Shqipëria e transformimit dhe rritjes ekonomike
Rama theksoi se Shqipëria ka bërë një transformim të jashtëzakonshëm, si në sektorin e turizmit, ku aeroporti kryesor i Shqipërisë ka kaluar atë të Beogradit, ashtu edhe në sektorin e infrastrukturës, me kantiere që hapen çdo vit.
“Shqipëria e 700 tenxhereve politike mediatike, ku zien me histeri i gjithë llumi i gjysmë të vërtetave që janë edhe gënjeshtrat më të mëdha, ku linçohen njerëz e familje pa asnjë gajle, për lloj-lloj arsyesh të mosarsyes, nga gjobat e portalexhinjve tek ligësitë e poterexhinjve dhe mllefet e pallavraxhinjve, nuk e mund dhe as nuk e zmbraps dot kurrësesi Shqipërinë e të gjithë kapitujve të hapur të negociatave për anëtarësim në Bashkimin Europian; Shqipërinë Turistike me aeroportin kryesor të rajonit, që për të disatin vit edhe këtë vit, ka lënë mbrapa aeroportin historikisht kryesor në Ballkan, atë të Beogradit; Shqipërinë e transformimit digjital dhe të rritjes së qëndrueshme ekonomike, ku paga mesatare ka arritur tanimë në 830 euro; Shqipërinë e transformimit epokal të infrastrukturës, ku kantiere të reja hapen çdo vit, qoftë për arteriet e mëdha të vendit e qoftë për ato të voglat”, tha Rama.
Shqipëria e sovranitetit energjetik dhe industrisë ushtarake
Një tjetër pikë ishte sovraniteti energjetik i Shqipërisë, i cili pritet të bëhet eksportues neto i energjisë brenda këtij mandati të katërt të qeverisë Rama.
“Shqipërinë e sovranitetit energjetik, e cila brenda këtij mandati të katërt do të jetë ekportuese neto e energjise dhe s’do të paguajë më asnjë qindarkë për të blerë energji jashtë vendit; Shqipërinë e rilindjes së industrisë ushtarake, e cila do të mikpresë Samitin e Natos në 2027 dhe do ta mbrojë atë ditë qiellin me dronet e prodhuar në vendin tonë”, tha Rama.
Shqipëria e të ardhmes: Integrimi europian dhe sundimi i ligjit
Në fund, Rama bëri thirrje për vazhdimin e angazhimit për integrimin europian të Shqipërisë dhe për një të ardhme ku sundon ligji dhe drejtësia.
Rama theksoi se Shqipëria është në rrugën e integrimit europian dhe se nuk do të lejojë që asnjë zhurmë politike dhe mediatike të pengojë përpjekjet për të ndërtuar një shtet të fortë, të drejtë dhe të qëndrueshëm.
“Shqipëria e 700 tenxhereve politike mediatike dhe histerike, nuk e mund dhe nuk e përul dot as në moralin e luftës kundër korrupsionit, Shqipërinë e Reformës në Drejtësi, Shqipërinë e Pavarësimit të Drejtësisë nga Pushteti Politik, Shqipërinë e qeverisur nga forca e pasionit dhe vullnetit shtetndërtues, ku për herë të parë në histori, një parti në pushtet i hap rrugën drejtësisë për të pastruar me fshesën e ligjit edhe oborrin deri dje të ndaluar të pushtetit politik, përfshirë edhe pjesën e saj në atë oborr. Kjo Shqipëri, Shqipëria ime, Shqipëria juaj, Shqipëria e atyre që sot janë fëmijë dhe që meritojnë një vend të sundimit të ligjit dhe jo të sundimit të llumit, nuk do të mundet e as do të përulet dot nga Shqipëria e 700 tenxhereve politike mediatike, që nuk duan drejtësi për Shqipërinë, po duan destabilizim, duan rrëmujë, duan shkatërrim në dëm të Shqipërisë, nuk duan drejtësi me ligj po hakmarrje me llum, nuk duan drejtësi po vetëgjyqësi, linçime, poshtërime. Ne do të vazhdojmë të luftojmë për drejtesinë që i ka munguar këtij shteti qysh në lindjen e tij, 100 e kusur vjet më parë. Ne do të vazhdojmë të mbështesim organet e drejtësisë me gjithçka kemi në dorë për të bërë detyrën e tyre dhe do të mbetemi garantët e palëkundur të Reformës në Drejtësi, e të pavarësisë së drejtësisë nga politika, duke vazhduar të mbetemi zëri dhe forca më e madhe e shqiptarëve për Shqipërinë që askush tjetër nuk e mbron dot si ne, nuk e ndryshon dot si ne, nuk e bën dot siç do ta bejmë ne, Shqipërinë në Bashkimin Europian”, tha Rama.
