Pas gati një viti paralize politike, Kosova u rikthehet sot kutive të votimit, në një proces që mund të përcaktojë përparim në rrugën e bllokuar drejt Bashkimit Evropian.
Zgjedhjet e shkurtit nxorën një fitues të qartë, Lëvizjen Vetëvendosje të kryeministrit në detyrë, Albin Kurti, e cila mori 42 për qind të votave. Megjithatë, ajo nuk arriti të sigurojë shumicë absolute dhe më pas dështoi të formojë koalicion me ndonjë parti tjetër.
Në artikullin e publikuar online, theksohet se asnjë nga partitë kryesore opozitare nuk bashkëpunoi me Vetëvendosjen, as nuk i mbështeti përpjekjet e shumta të Kurtit për të zgjedhur kryetarin e Kuvendit. Kurti madje u tërhoq nga posti i kryeministrit për të qetësuar opozitën, por pa sukses.
Kjo detyroi presidenten Vjosa Osmani të shpallë zgjedhje të parakohshme, të shtatat që nga pavarësia. Para votimit të së dielës, partitë opozitare si Lidhja Demokratike e Kosovës (LDK), Partia Demokratike e Kosovës (PDK) dhe Aleanca për Ardhmërinë e Kosovës (AAK) nuk dhanë ndonjë sinjal se do ta ndryshojnë qëndrimin ndaj Kurtit.
“LDK, PDK dhe AAK e shohin Kurtin si një populist që ka dëmtuar marrëdhëniet me Perëndimin dhe ka sabotuar anëtarësimin në NATO dhe procesin e integrimit në BE”, nënvizon Politico.
Ekziston mundësia që të tri partitë opozitare të formojnë një koalicion për të shmangur një tjetër bllokadë politike. Megjithatë, deputetja Blerta Deliu-Kodra nga PDK i tha Politico-s se “mbetet të shihet se cilët do të jenë numrat”, megjithëse ajo pret që të formohet një qeveri pa Kurtin si kryeministër.
Nga ana tjetër, zëvendësministrja e jashtme në detyrë dhe kandidatja e Vetëvendosjes për deputete, Liza Gashi, tha për Politico se partia pret mbështetje të gjerë publike.
Në sfondin e kësaj krize politike, aplikimi i Kosovës për anëtarësim në BE mbetet “në sirtarët e Bashkimit Evropian”. Kosova aplikoi në vitin 2022, por që atëherë është shënuar pak përparim.
E nëse vendi dështon sërish të formojë qeverinë, Kosova rrezikon të humbasë qasjen në Planin e Rritjes prej 6 miliardë eurosh të BE-së për Ballkanin Perëndimor, pasi duhet të zbatojë reforma për të zhbllokuar fondet.
Në tablonë e përgjithshme nuk mungojnë serbët.
Presidenti i Serbisë, Aleksander Vuçiç, tha se shpreson “për një fitore të madhe dhe domethënëse” për partinë më të madhe të serbëve në Kosovë, Listën Serbe, duke pritur që ajo të sigurojë mandate për të “përfaqësuar interesat e serbëve, jo të Albin Kurtit”.
BE-ja ka tentuar të përmirësojë marrëdhëniet mes Kosovës dhe Serbisë përmes procesit të Dialogut; megjithatë, pavarësisht disa vite bisedimesh, ky ndërmjetësim ka prodhuar pak rezultate konkrete.
