Kryeministria ka reaguar menjëherë për akuzat e bëra ga Partia Demokratike lidhur me vizitën e kryeministrit Edi Rama në Turqi. Përmes një komunikate për shtyp, zyra e Kryeministrit sqaron se shefi i qeverisë ndodhet për një vizitë njëditore në Stamboll ku do të marrë pjesë në forumin e njohur publik të organizuar nga think tank “Fikir Sofrasi” (Tryeza e Ideve).
“Takimi i sotëm është edicioni i pesëmbëdhjetë i këtij organizimi, ku më pare kanë marrë pjesë si të ftuar nderi autoritete të larta vendase e të huaja në fushën e ekonomisë, tregtisë dhe turizmit. Tema e këtij takimi është “Perspektiva partneritetit strategjik Shqipëri-Turqi në fushën e Tregtisë dhe Industrisë”. Ne takimin e sotëm, ku i ftuari i nderit është Kryeministri shqiptar, do të marrin pjesë mbi pesëdhjetë industrialistë dhe investitorë të mëdhenj turq, në fushën e energjisë, turizmit, manifakturës, bujqësisë e shëndetësisë, si edhe rreth njëzetë përfaqësues të medias së shkruar dhe elektronike turke.” thuhet në komunikatën e Kryeministrisë
Sipas zyrës së shtypit të Ramës, kjo vizite e Kryeministrit Rama është në vazhdën e takimeve të zhvilluara më parë në Itali apo Gjermani, për tu takuar dhe nxitur sipërmarrësit e huaj të interesuar për të investuar në Shqipëri.
Kryeministria shpreh keqardhje për akuzat e bëra nga selia blu duke u shprehur se koha e sekserëve që negocionin në hotelet e botës pasuritë e popullit shqiptar për llogari të pushtetit familjar ka marrë fund bashke me atë pushtet në 23 qershor 2013.
“Për të hequr çdo “merak” të Partisë Demokratike vizita e sotme është koordinuar nga konsullata e përgjithshme e Republikës se Shqipërisë në Stamboll dhe njësoj si në të gjitha rastet e mëparshme do t’i bëhet me dije edhe publikut shqiptar përmes kanaleve të informimit publik. Me keqardhjen e zakonshme për fjalorin e ulët nga i cili Partia Demokratike nuk ndalet dot, është e udhës te rinënvizohet edhe sot se koha e sekserëve që negocionin në hotelet e botës pasuritë e popullit shqiptar për llogari të pushtetit familjar që shporri vota e popullit shqiptar, ka marrë fund bashke me atë pushtet në 23 qershor 2013. Por fatkeqësisht ajo kohe është ende në mendjen e atyre që mbajnë peng sot e gjithë ditën opozitën e Shqipërisë, te cilëve u ka ngelur ora tek zullumet e vjetra.” shprehet kryeministria
Rama në Stamboll merr pjesë në “Sofrën e Ideve”
Kryeministri i Shqipërisë, Edi Rama ndodhet sot për një vizitë në Stamboll, raporton Anadolu Agency.
Kryeministri Rama ndodhet në Stamboll me ftesë të drejtuesve të platformës “Sofra e Ideve” e cila drejtohet prej një viti e gjysmë nga Ahmet Arslan.
Platforma “Sofra e Ideve” e cila do të ketë si të ftuar nderi Kryeministrin e Shqipërisë, Edi Rama që nga fillimet e saj njihet për takimet dhe ftesat ndaj shumë intelektualëve dhe drejtueseve shtetërorë turq. Vlen të përmenden takimet me shumë Ministra të Turqisë si dhe Guvernatorin e Bankës Qendrore të Turqisë.
Platforma deklaron se është larg ndonjë mendimi apo afrimiteti politik dhe si synim kryesorë ka rritjen dhe zhvillimin e Turqisë.
Ndërkohë nuk ka konfirmim nëse gjatë vizitës së tij në Stamboll, Kryeministri Rama do të ketë ndonjë takim të nivelit të lartë në këtë shtet.
Redaksia Online
(JavaNews.al)
