Sekretari i përgjithshëm i NATO-s, Mark Rutte, deklaroi se nuk ka kushtet për aktivizimin e nenit 5 të traktatit pas incidentit të djeshëm në Turqi, të lidhur me konfliktin në Iran.
“NATO-ja është e fortë dhe e vigjilente”, tha Rutte për SkyTg24, duke shtuar se Aleanca ndodhet në gjendje të lartë gatishmërie për shkak të përshkallëzimit në Lindjen e Mesme.
“E rëndësishme është që, siç pamë dje, NATO-ja është e fortë, e vëmendshme dhe shumë më e vigjilente tani krahasuar me të shtunën, për shkak të situatës në Lindjen e Mesme. Aktualisht nuk ka nevojë për aktivizimin e mekanizmit të mbrojtjes kolektive të Aleancës”, shtoi ai.
Kujtojmë se Irani mohoi këtë të enjte, 5 mars, se kishte lëshuar ndonjë raketë drejt territorit turk dhe deklaroi se respekton sovranitetin e Turqisë, sipas forcave të armatosura iraniane, raporton agjencia shtetërore e lajmeve IRNA.
Një deklaratë ushtarake iraniane iu referua incidentit me rrënojat e raketës që ranë në provincën Hatay më 4 mars. Ajo theksoi se Irani respekton sovranitetin e Turqisë dhe mohon të ketë lëshuar ndonjë raketë drejt territorit turk.
