Mazhoranca ka vijuar edhe ditën e sotme turin e prezantimeve të kandidatëve për bashki në zgjedhjet vendor të 21 Qershorit.
Krerët e mazhorancës kanë qenë sot në Pogradec ku kanë prezantuar kandidaten për këtë qytet, Diana Mile.
Në fjalën e tij, kryeministri Edi Rama akuzoi opozitën se po përpiqet të ndjellë pakënaqësi mes njerëzve, me qëllim ndryshimin e pushteteve. Në këtë prezantim nuk kishin si të mungonin edhe batuat e kryeministrit i cili në fjalën e tij u shpreh se edhe Lasgushi i madh mes tij e Dianës, do të zgjidhte Dianën, ndërkohë që kandidatit të PD-së, do t’i lëshonte qenin.
“PD do që të nxisë pakënaqësi dhe duke krijuar një situatë konfliktuale të gënjejë sa më shumë njerëz. Do që nëpër bashki të vendosë njerëz që nuk bëjnë punë, por që thonë se qeveria është e poshtër, se po i varfëron njerëzit, se po i shkatërron ata. Por qeverinë le ta provojnë pas dy vjetësh”, ka thënë Rama.
Në të njëjtën linjë është shprehur edhe kryetari i LSI, Ilir Meta.
“PD të jetë e sinqertë në kërkesën për votë që u bën qytetarëve, sepse nuk i kërkon ato për t’u sjellë shërbim apo punësim, por thjesht për të thelluar një konflikt artificial me qeverinë, për të ngjallur pakënaqësi tek populli shqiptar. Sepse ata nuk kanë asnjë program dhe vetëm shajnë. Jam i bindur se kandidatia jonë Diana Mile do të vazhdojë rrugën e nisur nga aleanca jonë”, tha Meta.
Kreu i Kuvendit ka shtuar se, së shpejti do të nisë ndërtimi i aksit Qukës-Qafë Plloçë, që sipas tij do t’i japë zhvillim ekonomik gjithë rrethit të Pogradecit.
