“Kop Frut” në Dibër është fabrika më e re e prodhimit të lëngjeve të frutave në industrinë agroushqimore shqiptare. Kryeministri Edi Rama ishte sot në këtë fabrikë, ku me mbështetjen e qeverisë shqiptare përmes Agjencisë së Zhvillimit Bujqësor dhe Rural, sapo ka vendosur në përdorim një linjë moderne të përpunimit të frutave për prodhimit të lëngjeve 100% bio. Me investimin e ri, pronari i kompanisë synon të rrisë prodhimin, punësimin dhe dalë në tregun e huaj. Fabrika punon me prodhimin vendas të frutave.
“Ne jemi shumë të kënaqur dhe ju falenderojmë, se investimi shihet. Ka qenë një kontroll i rreptë si nga ana juaj dhe AZHBR. Faza tjetër është të nxisim punësimin, përpunimin dhe eksportin. Do fillojmë bashkëpunimin me fermerët, që të prodhojmë dhe të shesim produktin. Vendet e punës do jenë me mijëra. Sepse siç është Dibra, është edhe Korça, sepse ky produkt do vijë edhe nga Korça. Shkojnë deri në 1500 vende pune, që janë zinxhir, duke thënë nga një të punësuar për familje, se mund të jenë edhe tre a katër për familje,” – tha ai.
Sipas Drejtores së AZHBR-së, Suela Popa, me këtë investim janë rritur edhe mundësitë për grumbullimin e frutave nga fermerët vendas, veçanërisht kultivuesve të mollëve nga qarku i Korçës. Agjencia, garantoi ajo, do të vazhdojë të mbështesë investimet në prodhim, me synim krijimin ciklit të mbyllur në vend mes përpunuesve, grumbulluesve dhe prodhuesve vendas të frutave.
“Ne jemi të lumtur sot, sepse përmes këtij investimi kemi mbështetur financiarisht të gjithë grumbulluesit e frutave në zonën e Dibrës, por nga ana tjetër kemi zgjidhur dhe një ngërç të krijuar në qarkun e Korçës, që është pikërisht shitja e këtyre produkteve. Tashmë ne po bëjmë lidhjet midis qarqeve. Produktet e Korçës mund të vijnë shumë mirë të përpunohen në Dibër dhe ne të arrijmë të lidhim kontrata me vendet e rajonit,” tha Popa.
Ambicia, por edhe siguria e sipërmarrësit për të bërë sukses në tregun rajonal e më gjerë është e madhe. Ndërtimi i rrugës së Arbrit, sipas tij, do të lehtësonte shumë fermerët e zonës, një shqetësim që ia shprehu edhe Kryeministrit. “Sa vinte Berisha në Maqellarë, populli thoshte rrugën e Arbrit. Nuk e bëri. Normalisht duhet të na e kishte.”
Kryeministri siguroi se edhe kjo rrugë është vënë në drejtimin e duhur. “Ai ka punën e vet, ai është në drejtimin e vet. Drejtimi i duhur jemi ne. Rruga e Arbrit ka kaluar në parlament fillon puna. Por ndërkohë duhet ta plotësojmë me mbështetje të madhe për bujqësinë.”
