Mojtaba Khamenei tha se Irani nuk do të hezitojë të hakmerret për gjakun e iranianëve që janë vrarë.
Në deklaratën e parë si Lider Suprem, Khamenei përmendi edhe humbjet e familjarëve të tij, babanë Ali Khamenei, të cilin e pasoi në detyrë, dhe bashkëshorten e tij.
Mojtaba Khamenei: Kjo është diçka që e ndaj me njerëzit që kanë humbur të dashurit e tyre sepse unë humba babanë tim, humba gruan time. Motra ime humbi fëmijën e saj, si dhe burrin. Por ajo që na e bën më të lehtë të durojmë të gjitha këto vështirësi është të besojmë në hirin e Perëndisë dhe të dimë se durimi do ta zgjidhë atë. I siguroj të gjithë se nuk do ta injorojmë faktin se do të hakmerremi për martirët tanë. Nuk ka të bëjë vetëm me faktin se ata martirizuan udhëheqësin tonë suprem. Dhe nuk ka të bëjë vetëm me të, ka të bëjë me çdo bashkatdhetar që është vrarë gjatë luftës së fundit.
Deklarata e Khameneit, u lexua në median shtetërore iraniane.
Mojtaba Khamenei u zgjodh Lider Suprem i Iranit pas vrasjes së babait të tij, Ali Khamenei më 28 shkurt, në ditën e parë të sulmeve të SHBA dhe Izraelit.
Khamenei nuk është shfaqur publikisht që kur u zgjodh për të pasuar të atin, teksa është raportuar se është plagosur nga sulmet.
