Kryeministri Edi Rama e krahasoi sot informalitetin e ekonomisë me një kancer që ka prekur organizmin e vendit.
“Informaliteti dobëson cilësinë e produteve dhe dobëson shërbimet, njësoj si një kancer që dobëson organizmin dhe kanceri nuk luftohet me karamele, por me agresivitet.”, tha kryeministri Rama, në fjalën e tij në aktivitetin “Beteja kundër informalitetit” me administratën tatimore dhe bizneset.
“Takimi i sotëm dhe diskutimet shërbejnë për të kuptuar batakun ku ka gëluar ekonomia shqiptare për shkak të informalitetit”, theksoi Rama.
Kreu i qeverisë kritikoi ata që “flasin në emër të aspiratave duke mbrojtur të varfërit duke thënë se po të jesh i varfër ke incentivë shkeljen e ligjit dhe për të varfrit çdo qeveri u mjaftoka me mbylljen e syve dhe sigurimin e lëmoshës”.
Kjo, u shpreh Rama, “nuk e zgjidh varfërinë, por krijon një rreth vicioz, ku hendeku mes të pasurve dhe të varfëreve shkon duke u zgjeruar. Nuk ka asnjë teori që mbron informalitetin që pretendon se një ekonomi informale ka një ndarje më të arsyeshme”.
Sipas kreut të ekzekutivit, ekonomia informale godet në radhë të parë të dobtit, nuk i lejon të forcohen dhe stimulon pasurimin marrmandës të një grupi gjithnjë më të vogël njerëzish.
Kryeministri Rama u shpreh se, “ne kërkojmë të jemi vend europian dhe pikërisht pse jemi të varfër duhet të synojmë lart dhe të përballemi me problemet. Nëse do e kishim bërë këtë gjë 20 vjet më parë, sot nuk do të përballeshim me këto biseda”.
“Shqiptarët që punojnë ndershëm dhe që janë shumica e duan këtë reformë”, tha Rama duke shtuar se edhe biznesi i ka kërkuar hapur qeverisë për të formalizuar ekonominë.
