Pas përshkallëzimit të tubimit në Shkodër, ku protestuesit u vunë flakën orendive të selisë së PS-së dhe e sulmuan godinën me gurë, kryeministri Rama e krahasoi opozitën me terroristët e Boko Haram që përdor fëmijët si kamikazë. Lidhur me deklaratat e kreut të qeverisë ka ardhur edhe reagimi i Sekretarit të Përgjithshëm të PD-së Gazment Bardhi.
“Gjuha e urrejtjes dhe përpjekjet e dëshpëruara të Edi Ramës për të fajësuar PD për 7 vitet e dështimit, premtimeve boshe dhe arrogancës së tij, tregojnë sa larg realitetit ku jetojnë shqiptarët, është ky njeri dhe shpura e tij. Keqqeverisja, dhuna dhe arroganca 7-vjeçare e Edi Ramës janë shkaktarët e vetëm të revoltës dhe zemërimit të të rinjve”, shprehet Bardhi.
Më herët kryeministri Rama do të shkruante në “Twitter”: “Uroj shumë dhe besoj fort se nuk ka prind demokrat e opozitar që ta pranojë këtë abuzim ekstrem me kalamajtë të udhëheqësve pa atdhe, pa din e as iman, pa shpirt e as tru, të kësaj opozite të mjerë në boshllëkun e saj moral dhe karakterin e saj kriminal! Mos i harroni këto kurrë!”
Kujtojmë që sot ka hyrë në ditën e katërt protesta për vrasjen e 25-vjeçarit Klodian Rasha nga efektivi i policisë Nevaldo Hajdaraj, ku pas Shkodrës pritet një tubim në Tiranë.
g.kosovari
