Kryeministri Edi Rama priti në një takim në selinë e kryeministrisë Përfaqësuesen e Lartë për Politikën e Jashtme dhe të Sigurisë të BE-së, Federica Mogherini.
Pas takimit kokë më kokë mes dy autoriteteve të larta, u nënshkrua Marrëveshja e Sigurisë, në sallën e hartave në kryeministri.
Burime të ministrisë së Jashtme shqiptare bëjnë të ditur se marrëveshja parashikon procedurat e shkëmbimit, mbrojtjes dhe sigurisë të informacionit të klasifikuar midis palëve, kryesisht për çështjet ushtarake.
Më pas, Rama dhe Mogherini dolën në konferencë për shtyp.
Kryeministri e falënderoi Mogherinin për vizitën në Tiranë dhe fjalimin në Kuvend.
Rama foli për Reformën në Drejtësi, duke pranuar se “pa praninë tuaj, të ambasadorëve të huaj, të dërguarve europianë, ne nuk do të ishim këtu, pranë realizimit të kësaj reforme”.
“Dialogu me komisionin e nivelit të lartë europian që do të zhvillohet në Tiranë do të jetë një tjetër moment i rëndësishëm që tregon se nuk ka as kthim pas dhe as qëndrim në vend”, tha Rama, në lidhje me Reformën.
“Sot kemi një raport të Komisionit të Venecias dhe shpresoj që të gjitha palët të ndjekin me përpikmëri rekomandimet dhe me shpejtësi ta vëmë në jetë. Nuk dua të flas më gjatë për Reformën, sepse gjërat janë thënë e stërthënë, tani është momenti për t’i bërë”.
Kryeministri foli edhe për krizën e refugjatëve, duke shpjeguar se “Shqipëria është një vend i vogël, por asnjëherë nuk i ka bërë bisht përgjegjësisë para partnerëve të saj ndërkombëtarë”.
“Mesazhi i BE është i njëjtë me ate të SHBA-ve. Jeni duke bërë gjënë e duhur për vendin dhe ndryshimi është i dukshëm. Keni ndërtuar një rrugë të shkëlqyer për në Europë, prandaj ju mbështesim” – tha Mogherini
