Kryeministri Edi Rama ka deklaruar se qeveria do të rindërtojë Teatrin Kombëtar, një projekt ky i shumë viteve më parë që rinis sot për të sjellë në jetë një teatër të standarteve europiane në kryeqytet.
Gjatë ceremonisë së prezantimit të projektit për ndërtimin e një qendre teatrale multifunksionale në ambientet e ish-Institutit Meteorologjik dhe rikonstruksionin e TKOB, kryeministri Rama theksoi se ka ardhur koha për të investuar në art.
“Është koha për të rindërtuar Teatrin Kombëtar, është në një vend kyç, është mirë që të mbetet aty. Teatri Kombëtar do rindërtohet sipas standardeve bashkëkohore. Teatri do pajiset me të gjitha instrumentat. U pengua rindërtimi i tij, por ne do bashkëpunojmë me Bashkinë e Tiranës dhe faktorë të tjerë për të pasur një teatër me standarde bashkëkohore.” tha Rama.
Rama i ka dhënë dhe një përgjigje zërave kritikë të cilët kanë sulmuar investimet e qeverisë në art, kulturë dhe sport.
“Ka shumë njerëz që me dashje apo pa dashje e harrojnë vlerën e madhe që kanë këto investime dhe shpesh reagojnë ndaj këtyre projekteve duke thënë ne s’kemi bukë ç’na duhet teatri, muzeu, stadiumi. E vërteta është që në asnjë vend ku s’ka teatër, muze, stadium, s’ka jetë kulturore dhe sociale s’ka as bukë, sigurisht që do ishte bisedë e gjatë nëse është buka që sjell artin apo arti që sjell bukën, por s’ka pikë dyshimi që investimet në art dhe kulturë e sport janë patjetër investim edhe në ekonomi dhe në mirëqenien shpirtërore dhe materiale. Të thuash t’i lëmë këto se ka njerëz që mezi ia dalin të sigurojnë bukën domethënë të pranosh që ata njerëz ti lësh gjithë jetën në të gjendje dhe të mos kesh ambicien që edhe ata të dalin ng kjo gjendje”, u shpreh Rama.
Kryeministri nuk ka harruar që të përmendë edhe një citim të Kadri Roshit.
“Mbaj mend një shprehje të të madhit Kadri Roshi që thoshte se, Një artist nëse nuk bëhet me pluhur nuk bëhet artist”, por unë do thoja se Me sa pluhur ne kemi në salla do kishim çuar në botë mijëra artistë. Skenat tona kanë nevojë për investime serioze dhe me standarde” tha Rama.
Kryeministri ka shtuar se, në muajin janar do të nisë rikonstruksioni i Teatrit të Operas dhe Baletit, ndërkohë që falë investimit të bërë është rikonstruktuar edhe Qendra Multifunksionale Teatrale në ish godinën e Meteorologjisë. Ai tha se investimet që janë bërë dhe po bëhen janë sa vlera totale e investimeve të bëra në vend në 25 vite në infrastrukturë.
“Kjo qendër ishte e braktisur dhe e mbushur me mbeturina, shërbente si laborator hidroteknik dhe sot ka nisur që të transformohet në skenën e re të kryeqytetit. Ndërtimi i një skene të re për njerëzit e teatrit. Dy salla me 400 spektator dhe mjedise të tjera që do të jenë alternativë e shkëlqyer me standarde që asnjëherë më parë nuk i kanë pasur regjisorët dhe aktorët. Aktualisht janë gjendje shumë e rënduar dritaret, tavanet,dyshemetë etj. Investimi është i konsiderueshëm. Teatri i Operas e Baletit do ketë një investim që është i barabartë me investimet në infrasturkurë në 25 vite. Do përfundojë rikonstruksioni i Jordan Misjes, do pajiset me pjano të reja, salla të reja, shkolla koreografike” tha Rama.
