Në një dalje për median, një ditë pas deklaratës ekstreme të Berishës për të marrë armët, Kryeministri Edi Rama e ka cilësuar atë si një personazh qesharak. Rama deklaroi se qëllimi i vetëm i Berishës është bllokimi i reformës në drejtësi.
Kryeministri theksoi se nuk është e rastit që intensiteti i sulmeve të opozitës është rritur, pasi sipas Ramës, sulmet bëhen për të gjetur arsye për të bllokuar reformën në drejtësi.
Rama la të kuptohet se në çdo vend normal dhe me një drejtësi funksionale një deklaratë e tillë si ajo e Berishës do kishte sjellë dhe reagimin e Prokurorisë.
“Ka disa arsye për të hetuar Berishën, kjo e thirrjes së popullit për tu armatosur është vetëm një arsye më shumë, në një vend normal tellalli duhet të ishte para prokurorëve, kështu e thotë edhe ligji në një vend normal. Po Shqiperia s’mund të jetë një vend tërësisht normal per sa kohe farë shkruhet në ligj nuk vlen njësoj për të gjithë. Shqipëria s’ mund të bëhet vendi normal që meritojnë njerëzit normal të këtij vendi për të cilët ligji lexohet dhe zbatohet ndryshe, nga ata që i bëjnë ligjet, apo paguajnë nga taksat e shqiptarëve për ti trajtuar të gjithë si të barabartë.
Ligji lexohet ndryshe dhe zbatohet ndryshe për ata që i bëjnë ligjet dhe që paguhen nga taksat e shqiptarëve. Prandaj Sali Berisha nuk është hetuar deri më sot për cfarë ka bërë dhe as mund të hetohet për çka tha dje, përsa reforma në drejtësi nuk votohet dhe nuk do të zbatohet.
Saliu është shëmbëlltyra më monumentale e të fortëve të veshur me kostum. Parlamenti nuk u tregon shqiptarëve rëndësinë e ligjeve që miraton për të cilat nuk flitet fare, por u tregon pamundësin e ligjit.
Sa më shumë rritet presioni publik e ndërkombëtar për reformën aq më shumë rritet tensioni në parlament. Sa më shumë afrohen afatet fundore të reformës, aq më shumë tensionohet partia demokratike.
Prej kohësh ka ardhur në rritje një tension artificial me Saliun në krye të PD-së. Ky tension është i planifikuar ka ardhur në rritje… Kjo dinamikë është pjesë e një plani të mirëmenduar. Saliu nuk e do reformën, pikë. As PD smund ta dojë reformën, jo sepse nuk e do Saliu, edhe pse kjo është një arsye, por nga ideja se reforma mund t’i kthejë nga persona të veshur në kostum, në të pafuqishëm përpara ligjit. As Saliu dhe asa PD nuk kanë kurajo ta thonë që nuk e duan reformën, dhe duan ta hedhin në erë duke rritur intensitetin e akuzave, në pritje që të plasë ndonjë gjë, në mënyrë që ata të justifikojnë bllokimin e reformës. Ja pse është rritur këto ditë volumi i plehrave dixhitale që ka prodhuar Saliu.”- tha Rama.
