Kryeministri Edi Rama ishte sot në Tepelenë në takimin e radhës elektoral, ku kërkoi nga banorët votën për kandidatin e Aleancës për Shqipërinë Evropiane Tërmet Peçin.
Por shefi i qeverisë nuk i shmangu dot akuzat për Partinë Demokratike dhe kandidatët e saj. Sipas Ramës opozita jo vetëm që nuk ofron asnjë vizion për qytetarët, por se selia blu sipas tij është katandisur në një forcë të madhe dekonstruktive.
“Ne kemi një detyrim të madh që t’u japim mbështetje të plotë programit të kandidatëve tanë, ndërkohë që në anën tjetër është një fushatë për të ardhur keq dhe për t’u ndjerë të turpëruar që në 2015, në mes të Europës, një parti që u krijua si forcë e madhe e shpresës, është katandisur në një forcë të madhe dekonstruktive, që e ka transformuar këtë fushatë në një fushatë për të zgjedhur dhe mbledhur sa më shumë budallenj në Shqipëri, duke ju treguar një përrallë nga e kaluara, që Tepelena dhe gjithë Shqipëria e refuzuan më 23 qershor të 2013-ës”, tha Rama.
Rama tha se “mazhoranca e majtë ka treguar në 18 muaj që është e vetmja rrugë që mund të bëjë, po bën dhe do të bëjë shtet për shqiptarët”. Kryeministri u ndal edhe tek kandidati i pavarur, Dritan Memushi, një ish-socialist, duke e cilësuar atë një diversant që nuk i duhet të jepet asnjë votë.
“Kjo është si ajo fjala e urtë, mirë gomari ngordhi, po s’na lënë as mizat rehat. Tani mirë Veipi (kandidati i PD), por s’na lë rehat edhe një diversant që ka dalë këtu nëpër Tepelenë, që synon të ndajë aty ku Tepelena nuk ndahet kurrë, në mënyrë të ulët, krahinore, të turpshme. Asnjë votë për atë! Unë i kuptoj shumë mirë edhe demokratët që mund të jenë njerëz të mencur e s’kanë c’të bëjnë por s’kuptoj dot askend që mund të votojë atë”, deklaroi kryeministri.
