Këshilli i Ministrave i Shqipërisë ka miratuar një vendim për kompensimin financiar të kontributeve të sigurimeve shoqërore dhe shëndetësore për punëdhënësit që preken nga rritja e pagës minimale.
Sipas vendimit, kompensimi do të jepet çdo muaj për periudhën kontributive janar–shtator 2026, për subjektet që kanë punonjës me pagë bruto nga 40 mijë deri në 49 999 lekë. Masa e kompensimit mbulon 16.7% të kontributeve të punëdhënësit, të llogaritura mbi diferencën mes pagës së deklaruar dhe pagës së re minimale prej 50 mijë lekësh.
Kompensimi financiar do të llogaritet bazuar në numrin maksimal të punonjësve me këtë fashë page, sipas listëpagesës së deklaruar në organet tatimore për muajin shtator 2025.
Subjektet përfituese duhet të ushtrojnë aktivitet në sektorë të ndryshëm ekonomikë dhe të plotësojnë disa kritere, mes të cilave: të mos jenë në pronësi shtetërore apo ente publike dhe të mos kenë detyrime për kontributet e sigurimeve shoqërore dhe shëndetësore në momentin e aplikimit.
Aplikimi për përfitimin e kompensimit do të kryhet në mënyrë elektronike përmes portalit e-Albania, duke nisur nga 1 prilli 2026 deri më 31 tetor 2026.
Verifikimi i aplikimeve do të bëhet përmes sistemeve elektronike dhe pagesat do të kryhen nga Agjencia Kombëtare e Punësimit dhe Aftësive përmes drejtorive rajonale, brenda 10 ditëve të para të çdo muaji për kërkesat e muajit paraardhës.
Efekti financiar për zbatimin e këtij vendimi do të përballohet nga buxheti i shtetit për vitin 2026, në kuadër të programit “Tregu i punës”, të Ministria e Ekonomisë dhe Inovacionit. Vendimi hyn në fuqi pas botimit në Fletoren Zyrtare.
