Rihapja e segmentit Librazhd-Prrenjas rikthen fluksin e madh të automjeteve në aksin kombëtar Tiranë–Elbasan–Librazhd–Pogradec–Korçë, një nga arteriet kryesore që lidh kryeqytetin me juglindjen e vendit.
Pasditen e së premtes, qindra automjete nisën lëvizjen drejt zonave turistike si Pogradec dhe Korçë, duke shkaktuar ngadalësim të qarkullimit dhe radhë të gjata ne disa segmente, veçanërisht nga Tuneli i Krrabës drejt Dopajt dhe Hinkës së Shijonit, raporton gazetari i Klan News, Fatos Salliu.
Për të menaxhuar situatën, shërbimet e Policisë Rrugore të Drejtorisë Vendore të Elbasanit u vendosën në terren për disiplinimin e trafikut dhe shmangien e bllokimeve të mëtejshme.
Fluksi i lartë pritet të rikthehet pasditen e së dielës, me kthimin e pushuesve drejt Tiranës.
