Mësues dhe nxënës të Qendrës Profesionale të shkollës “Don Bosko” protestuan të mërkurën kundër vendimit të Gjykatës së Apelit, Tiranë për rikthimin e truallit pronarëve.
Përfaqësues të Qendrës u shprehën kundër vendimit të Gjykatës, ndërsa kërkuan edhe mbështetjen e trupit diplomatik të akredituar në vendin tonë.
Sipas tyre, në bazë të vendimit të Gjykatës së Apelit të Tiranës, Qendra rrezikon të përgjysmohet e kështu të mos kryejë më funksionet e veta në dobi të shoqërisë për moszbatim të kontratave ndërmjet shtetit dhe Kishës Katolike në Tiranë.
“Kisha Katolike dhe Shoqata “Don Bosko” ndodhur përpara vendimeve të tilla të marra jo në mbrojtje të interesave të ligjit duan të sensibilizojnë opinionin publik për t’i thënë ‘jo’ abuzivizimit dhe korrupsionit dhe ‘po’ shtetit të së drejtës dhe ligjshmërisë”, thuhet në njoftimin për shtyp të Qendrës ‘Don Bosko’.
Historik
Në vitin 1992 Autoritetet Shqiptare të kohës i kërkuan Nunciaturës Apostolike në Shqipëri (Ambasade e Vatikanit) mundësinë e krijimit në Tiranë të një Qendre Shoqërore e të Formimit Profesional e Kulturor. Për këtë qëllim iu dha edhe një truall prej 5 ha në Tiranë, në Rrugën që ka marrë emrin “Don Bosko”.
Nunciatura Apostolike ia besoi ndërtimin dhe administrimin e kësaj “Qendre Shoqërore e të Formimit Profesional e Kulturor” Etërve të Komunitetit Salezianë, të cilët krijuan dhe veprojnë në Shqipëri nëpërmjet Shoqatës “Qendra Sociale Don Bosko”.
Mbi këtë truall janë kryer ndërtime mbi bazën e lejeve ndërtimore që në vitin 1992 e në vijim, për të mundësuar “Veprën Shoqërore të Formimit Profesional e Kulturor të të Rinjve”.
Me vendimin e KM Nr. 5 dt. 06.01.1997 “Për dhënien me qira të truallit ku është ndërtuar objekti “Vepra shoqërore të formimimit profesional e kulturor nga Nunciatura Apostolike në Shqipëri”, trualli i mësipërm është dhënë me një qira vjetore simbolike prej 10 $ për ha për një periudhë prej 49 vjet.
Në vitin 2012 Zyra Rajonale e KKP të Qarkut Tiranë me vendimin Nr.211 datë 29.06.2009 i ka kthyer ish pronarëve 15.000 m2 të truallit të ndodhur brenda rrethimit të “Veprës Shoqërore të Formimit Profesional e Kulturor të të rinjve”, pra brenda trualli të dhënë me qira për 49 vjet.
Avokatura e Shtetit ka ngritur padi në gjykatën e Tiranës kundër këtij vendimi dhe, Gjykata e Tiranës ka vendosur pranimin e saj, pasi trualli në bazë të ligjit “Për kthimin dhe kompesimin e pronave ish pronarëve” konsiderohej i zënë.
Por në datën 16.02.2015, Gjykata e Apelit Tiranë vendos prishjen e vendimit të gjykatës së rrethit dhe trualli t’ju kthehet ish- pronarëve, pasi sipas vendimit të kësaj gjykate ky truall kishte ndërtime të përkohëshme: si terrene sportive, dhoma zhveshje, dushe, etj. dhe trualli konsiderohet i lirë. ATA
