Nga Artur Ajazi
Qafirët e politikës së vjetër në Shqipëri, janë aleatët më të mirë të një situate të tillë, për të mos thënë më të zellshmit e coronavirusit.
Ata kanë 1 muaj që grinden me vehten, grinden me qeverinë, grinden me shqiptarët, thërrasin “urra” kur rritet numëri i të infektuarve dhe atyre që humbin betejën me virusin misterioz, grinden me mjekët, infermierët edhe kur kryejnë misionin e tyre fisnik, edhe kur ata nisen drejt një vendi mik për ti ndihmuar, grinden qafirët me kryeministrin e vendit, gjithmonë kur ai del në ekrane dhe ripërsërit këshillat, masat rradikale aq të nevojshme, grinden ata me vendimet e qeverisë që lehtësojnë xhepat e shqiptarëve dhe arkën e biznesit.
Qafirët e politikës së vjetër, nuk po lenë ditë dhe natë pa shpikur dhe shpifur për “firma fantazëm” për “tendera korruptivë” apo edhe për “harxhime luksi”, në një kohë që milionerët e tyre të pacipë, deri sot nuk kanë kontribuar as edhe 1 qindarkë për familjet në vështirësi ekonomike.
Dalin njëri pas tjetrit, qafirët e ngopur me ushqime të standartizuara dhe miliona të zhvatura, dhe u bëjnë moralistin atyre që dalin me siklet dhe bëjnë ndonjë pazar tek tregu lagjes, duke blerë ndonjë miell, sheqer, apo kg mollë për fëmijët e tyre.
Tallen qafirët, edhe me mësuesit dhe policët, tallen edhe me ushtarakët dhe drejtuesit e tyre, sepse kështu u thotë “sulltani”, të shpifim dhe shpikim sa më shumë në kohë të tilla, “për të mbposhtur Edi Ramën”.
Atyre nuk u bën asnjë përshtypje, heroizmi i mjekëve, infermierëve, bashkiakëve, policisë, ushtrisë, tatimorëve dhe punonjësve të terrenit, nuk u bën përshtypje atyre as ndihma e madhe e vullnetarëve në çdo bashki të vendi, që po trokasin në çdo derë hallexhiu, dhe po ndihmojnë me ushqime dhe medikamente.
Atyre u bën përshtypje vetëm Voltana, “ankesat” e saj apo “akuzat” e saj për qeverinë, dhe fërkojnë duart kur në Shkodër, shënohet ndonjë rast i ri me coronavirus. Qafirët mezi presin rastin, që Edi Rama të dalë në rrjetet sociale dhe të komunikojë on-line me shqiptarët, sepse do ti “kapin” atij ndonjë fjalë, për ta bërë kryefjalë të deklaratës së shtypit.
Gjithsesi kjo situatë, (apo kjo luftë siç e quan Rama) shënoi edhe një ndasi tjetër, rreshtoi në njërën anë heronjtë e saj , dhe në tjetrën qafirët, bashibozukët, dhe aleatët besnikë dhe të zhurmshëm të coronavirusit.
