Rusia hodhi poshtë thirrjet për transparencë lidhur me vdekjen e një punonjëseje laboratori nga murtaja në Siberi, ndërsa dolën raportime për një rast të dytë infeksioni.
Rospotrebnadzor, organi mbikëqyrës i shëndetit publik i Rusisë, tha se nuk shihte asnjë rrezik epidemie pas vdekjes së një punonjëse 28-vjeçare të Institutit të Kërkimeve Kundër Murtajës në Irkutsk, e identifikuar si Darya Shipilova. Ajo vdiq javën e kaluar në qytetin Shelekhov pranë Irkutskut.
Agjencia tha se Shipilova ishte vaksinuar dhe kishte imunitet ndaj infeksioneve të rrezikshme me të cilat po punonte dhe se gati 5,000 teste laboratorike nuk kishin zbuluar patogjenë të rrezikshëm.
“Më shumë se 90% e atyre që kishin kontakt me të kishin përfunduar monitorimin mjekësor,” tha agjencia.
Kremlini hodhi poshtë raportet për një rast të dytë të dyshuar të murtajës në Siberi, duke u thënë gazetarëve se shumica e raportimeve të mediave mbi situatën ishin “të rreme”.
“Media raporton për shumë gjëra. Dhe shumica dërrmuese e asaj që media raporton për këtë situatë është informacion i rremë”, tha zëdhënësi i Kremlinit, Dmitry Peskov, duke u bërë thirrje qytetarëve të mbështeten vetëm në deklaratat zyrtare të Rospotrebnadzor.
Autoritetet ruse kanë pohuar që nga fillimi i javës se Shipilova vdiq nga pneumonia dhe se shkaku i vdekjes së saj mbetet “i papërcaktuar”.
Drejtori i Përgjithshëm i OBSH-së, Tedros Adhanom Ghebreyesus, i bëri thirrje të mërkurën Moskës të sqarojë situatën lidhur me raportet mediatike për një anëtar të dytë të stafit me pneumoni me origjinë të paqartë.
