Per ish- kreun e Sherbimit Sekret shqiptar, zbatimi i reformes ne drejtesi, Vettingut dhe mbi te gjitha ikja e Llalles dhe ardhja e Arta Markut ne krye te Prokurorise se Pergjithshme, ka sjelle panik ne radhet e opozites.
Fatos Klosi eshte shprehur ne menyre te qarte se kërkesa e opozitës për të ndryshuar Kushtetutën dhe ligjin në bazë të të cilit zgjidhet kryeprokurori i përkohshëm është një tregues frike.
Fatos Klosi nenvizoi se PD-LSI janë të frikësuar nga deklaratat e kryeprokurores Arta Marku, e cila sipas tij, po bën punën e saj.
“Prokurorja e Përgjithshme u zgjodh dhe po bën punën e saj. Mbase ajo i ka trembur me deklaratat e saj se do të ketë çudira.
Këto lëvizje janë frikë nga të gjitha proceset që ka thënë prokurorja, ambasadori amerikan, që për dreq i ka thënë edhe ai prokuror që ishte që do shikonim çudira, mirëpo unë kam frikë se mos jetë sëmundje prokurorësh kjo gjë. Mburren që do bëjnë shumë gjëra, dhe në fund nuk bëjnë asgjë.
Them që opozita është e frikësuar nga lëvizjet e Arta Markut”, u shpreh ish-kreu i SHISH për gazetën “Sot”.
Klosi e etiketoi si qesharake amendamentin e PD-LSI, teksa theksoi se opozita i bën këto nisma vetëm për të tërhequr vëmendjen e për të treguar se po bëjnë diçka.
“Ata s’kanë asnjë gjë në dorë. Kjo është shumë qesharake. I thanë ata çfarë kishin për të thënë. Opozita i ka thënë këto gjëra që s’jemi dakord etj, etj.
Por për këtë punë vendos shumica, nuk vendos pakica.
Kështu të gjitha këto nisma të opozitës janë për të kënaqur veten e tyre dhe për të treguar që janë akoma ekzistent e që po bëjnë diçka. Ja ne po prodhojmë diçka”, nënvizoi Fatos Klosi.
