Nga Ilir Yzeiri/
Ka disa orë që në rrjetet sociale po qarkullon një video e një emisioni që shfaqet në televizionin « Ora Neës » të një moderatoreje me emrin Roza Lati, e cila në fund të emisionit bashkë me të ftuarën një farë këngëtareje me emrin Kordana Kingji dredhin një cigare marijuhanë dhe pa iu dridhur qerpiku thonë se emisioni ynë është argëtues dhe jo edukativ.
Nuk kam ndërmend të shpjegoj për këtë dy vajza mendjelehta dhe pa integritet se çfarë është kultura dhe edukimi dhe se si përmes artit dhe kulturës njerëzit më së shumti argëtohen, por edhe edukohen me ndjenja të thella. Nuk është ky qëllimi i këti reagimi. E kam fjalën tjetërkund.
Të kuptohemi, secili është i lirë që në jetën private, larg syve të të tjerëve, të bëjë çfarë të dojë dhe mund ta shkatërrojë jetën e tij me gjithçka të ndaluar. Natyrisht, shoqëria i informon të gjithë se çfarë është mirë dhe çfarë është keq. Ne, për fat të mirë, jetojmë në demokraci dhe lirinë e të zgjedhurit dhe të vepruarit e kemi fituar me pashë. Secili është i lirë të çmendet sipas mënyrës së tij. Mirëpo, ka një ndryshim drastik midis jetës private dhe jetës publike. Cilido transmetues publik qoftë privat, qoftë jo, është i detyruar t’u përmbahet disa rregullave dhe ligjeve të shkruara. Atë hapësirë që të jep televizioni apo cilado medie tjetër askush nuk mund ta përdorë për të kryer vepra penale. Dhe, në këtë rast, ato dy vjaza kanë shkelur rëndë ligjin.
Ato kanë shkelur ligjin 97/2013 PËR MEDIAT AUDIOVIZUALE NË REPUBLIKËN E SHQIPËRISË, nenin 4 pika b) që thotë : b) veprimtaria e transmetimeve audiovizive respekton paanshmërisht të drejtën për informacion, bindjet politike e besimet fetare, personalitetin, dinjitetin dhe të drejtat e liritë e tjera themelore të njeriut. Kjo veprimtari respekton në mënyrë të veçantë të drejtat, interesat dhe kërkesat morale e ligjore për mbrojtjen e të miturve;
dhe nenin 33, pika d që thotë : të respektojë rregullat e etikës dhe moralit publik dhe të mos transmetojë programe që mund të nxisin vepra penale.
Pra respekton fëmijët dhe nuk transmeton programme që ncisin vepra penale. Sipas kodit penal po ashtu është e ndaluar përhapja, reklama dhe përdorimi në publik i lëndëve narkotike.
Të gjithëve na kujtohet një plakë e mbaruar që ishte në burg se i kishin gjetur disa kg hashash në shtëpi dhe të gjithë e mbajnë mend vizitën e Edi Ramës dhe amnistinë që i premtoi asaj. Dhe bëri shumë mirë. Po këto dy delinkuente që nuk njohin asnjë filtër dhe ai televizion që i lejon këto marrëzira penale çfarë kanë më shumë se ajo plaka e mjerë. A e dinë këto se argëtime të tilla shkatërrojnë fëmijët dhe se të bësh propogandë për të pirë marijuhanë në një medie publike është krim ?
Ne jemi një shoqëri e shthurur dhe pa asnjë filtër. Kemi kaluar nga diktatura në një shkatërrim total të gjithçkaje dhe nuk pyesim as për fëmijët që i helmojmë qoftë me këto programme qoiiftë edhe me disa tekste idiote të shkollave.
