Pse ja prishët pushimet Profesorit?

I kanë prishur pushimet në Pogradec Rexhep Meidanit. E thirrën me qëllim që t’i bashkohej një dreke, duke vënë mbi pjatë premtimin e zgjedhjes…kryeministër. Një ëndërr që ai me shumë gjasë s’ka guxuar ta shohë kurrsesi, tani që ka hyrë thellë në muzgun e karrierës së tij politike.

Megjithatë alkimia më e fundit Meta-Kokëdhima, e cila duket si një shfaqje prestigjitatorësh, më shumë sesa një tryezë miqsh, ka prodhuar një emër i cili në fakt përbën një gjetje jo të keqe. Nëse s’është e vërtetë, është e gjetur mirë, thonë italianët. Tamam ashtu siç po ndodh këto orë me ish-presidentin, një person padyshim me integritet, vetëpërmbajtje (paksa inatçi, por në heshtje), e mbi të gjitha “i majtë”. Fiks ashtu siç i duhet dyshes magjike Meta-Kokëdhima. Me shumë gjasë PD s’ka për të pasur kundërshtime. Fundja PD varet tashmë kokë e këmbë nga Meta (dhe Kokëdhima, në rastin konkret).

Presioni më i fundit mbi qeverinë, me emrin e Rexhep Meidanit, është nga ato lista qeverish-hije, të cilat lindin e shfaqen me ritmin e çadrave të plazhit, në hijet e hoteleve të reja të Qeparoit. Për të cilat çuditërisht opozita e sotme dikur oshëtinte, kurse sot hesht. Si Meta, ashtu edhe Kokëdhima, janë të interesuar që ky presion të shkojë në rritje, mundësisht me ngushtimin dhe vështirësimin e negociatave të reformës (kërcënimi me rrëzim të qeverisë, ka qenë bashkëudhëtari më besnik i kësaj të fundit). Për të arritur më në fund në shtator, kur parashihet që LSI të përgatisë skenarin të cilin Ilir Meta e quajti një keqkuptim dhe sajesë tek Fevziu, e që përmblidhet në togëfjalëshin “qeveri ekspertësh”.

E tepërt të thuhet se koalicioni i ri virtual Basha-Berisha-Meta, tashmë po përpiqet të shtyhet edhe në sinoret e vjetra dhe të reja të së majtës. “Rekrutimi” i Kokëdhimës dhe trazimi i qetësisë verore të Meidanit janë provat se ka një përpjekje “gjithëpërfshirëse” për të krijuar masën kritike të votave, që do të sillnin largimin e Ramës nga pushteti.

Jo se ky do të ishte fundi i botës. Aspak! Por kur sheh listën që kapardiset restoranteve dhe nëpër zyrat e Kuvendit, seç të vjen pak si e përzier. Dhe jo nga ushqimi i prishur i verës, as nga këngët e ndjera të të rinjve që i këndojnë kryetarit të partisë, por nga lehtësia tronditëse e disa burrave për t’u sjellë si ato gratë që s’ja vlen t’u përmendësh emrin.