Partia Socialiste ka akuzuar sërish ditën e sotme kreun e bashkisë së Tiranës Lulzim Basha se po u fshihet qytetarëve. Në një dalje për mediat deputetja e PS Blerina Gjylameti tha se Basha nuk ka guxim t’u dalë përpara qytetarëve kryeqytetas për shkak të dështimeve të tij.
Jo vetëm kaq, por sipas Gjylametit, kreu i demokratëve duhet të paktën të gjejë guximin të dalë krah kandidatit të tij për Tiranën Halim Kosova
Deklaratë për media e deputetes së PS, Blerina Gjylameti:
Lulzim Basha ka frikë të duket në Tiranë. Shfaqet kudo, në SHQUP, në Kamëz, në jug e në veri por në Tiranë s’guxon të duket. Edhe pse zyrtarisht është ende kryetar i Bashkisë qytetarët e Tiranës kanë më pak shanse ta shohin Lulin sesa qytetarët e Holandës. Lulzim Bashës nuk ia mban më të duket as krah për krah me kandidatin e tij për Tiranën dhe t’u thotë qytetarëve se çfarë ka bërë në këto 4 vjet. Ka frikë se i prish punë. Ka frikë të dalë e të shpjegojë bashkë me Halimin sesi e ka mbajtur premtimin për tramin, për internetin falas, për rrugët e trotuaret, për parqet e reja dhe gjelbërimin, për hapësirat rekreative dhe këndet e lojërave për fëmijët. E sfidojmë Lulin të mos fshihet më pas zëdhënëseve por të dalë vetë përpara qytetarëve krah për krah me kandidatin Halim Kosova dhe të flasë për arritjet e tij dhe sesi Halimi do të vrasë mendjen për t’i çuar përpara këto arritje. Le ta organizojnë takimin me qytetarët në një nga parqet apo zonat argëtuese që ka ndërtuar Luli në këto 4 vjet. E vërteta është se Luli s’ka bërë asgjë. Jo s’e s’ka pasur mundësi, jo se e ka bllokuar qeveria, dhe jo sepse s’ka pasur para. S’ka bërë asgjë sepse është i paaftë të bëjë gjë. Sot banorët e Tiranës jetojnë në një qytet që ka më pak gjelbërim, më pak hapësira për nënat e fëmijët sesa 4 vjet më parë. Jetojnë në një qytet që është më i pisët se 4 vjet më parë dhe ka rrugë e trotuare shumë më të këqija se 4 vjet më parë, ku nuk është ndërtuar asnjë park e asnjë hapësirë rekreative. Prandaj në 21 qershor ata do ta refuzojnë Lulin dhe kandidatin e Lulit dhe do të zgjedhin drejtimin e duhur për Tiranën.
