Ministrja e Ekonomisë dhe Inovacionit, Delina Ibrahimaj, e ftuar në emisionin “Trialog” në RTSH nga gazetarja Alba Alishani, deklaroi se protestat e fundit nisën si reagim qytetar ndaj pamjeve të dhunës që tronditën opinionin publik, por sipas saj, me kalimin e kohës kërkesat e protestuesve kanë ndryshuar dhe nuk lidhen më me projektin që ishte në qendër të debatit.
Ajo shtoi se në ditët e para të protestës u artikuluan shqetësime për projektin në fjalë, por sipas saj shumica e protestuesve nuk kishin informacion të plotë mbi të.
“E kemi shprehur që në ditën e parë të protestës e cila është qytetare dhe ato kanë të drejtën e vet të protestojnë. Filloi si një protestë e nxitur nga disa pamje që dhe për mua si qytetare , si ministre ishin pamje të tmerrshme të një personi të dhunuar që ne sigurisht morëm masa të menjëhershme dhe e kuptoj dhe nxitjen e protestës. Ditët e para artikulohej projekti i cili pa diskutim që nuk njihej nga pjesa më e madhe e njerëzve që protestonin. Më pas kryeministri shpjegoi të gjitha hapat që kishte ndjekur projekti apo kërkesa për të pasur një projekt dhe një zhvillim në atë zonë dhe ndërkohë protesta ka avancuar me kërkesa të tjera të cilat nuk lidhen me projektin. Janë të gjitha kërkesa që janë politike dhe nuk lidhen me projektin”, u shpreh ministrja.
Duke folur për mundësinë e dialogut me protestuesit, Ibrahimaj theksoi se negociatat duhet të zhvillohen në një tryezë të qartë përfaqësimi.
Sipas saj, kërkesat duhet të vijnë nga grupe të identifikuara dhe të kenë një adresim konkret institucional.
Ministrja nënvizoi gjithashtu se qeveria nuk mund të marrë vendime të nxituara bazuar vetëm në reagime emocionale, duke kujtuar se Partia Socialiste ka marrë mbështetjen e qytetarëve në zgjedhjet e përgjithshme të zhvilluara një vit më parë.
“Në gjykimin tim negociatat apo diskutimet bëhen në një tryezë. Shoqëria civile është termë shumë i gjërë, shoqëria civile duhet të jetë e identifikuar, nga vjen kërkesa, si vjen kërkesa dhe ulesh në tryezë dhe i diskuton. Disa prej kërkesave që u dëgjuan sot ishin ndryshimet në kodin zgjedhor. Nuk i bën KQZ ndryshimet në kodin zgjedhor. Ato votohen në parlament ka një procedurë për të ndryshuar kodin zgjedhor dhe është shumë specifike. Nuk duhet të harrojmë që ne sot jemi një vit pas zgjedhjeve të përgjithshme, vërtet ka shumë protestues por ka dhe shumë qytetar që kanë votuar PS jo më larg se një vit më parë. Nuk mundet që një qeveri të reagojë me emocion për shkak të disa kërkesave të paidentifikuara se nga cila palë vijnë”, tha ajo.
Sa i takon mundësisë së negociatave, Ibrahimaj tha se në të kaluarën dialogu ka sjellë rezultate të pranueshme për të gjitha palët, por theksoi se aktualisht është e vështirë të parashikohet një proces i tillë për shkak të ndryshimit të vazhdueshëm të kërkesave që artikulohen nga protestuesit.
“Janë kryer negociata sa herë ka pasur protesta në të kaluarën që kanë rezultuar në një produkt i cili ka qenë i pranueshëm për të dyja palët. Unë nuk mund të parashikoj se çdo të ndodhë në momentin që do të dal një përfaqësi çfarë diskutimesh do bëhen në tryezë sepse ne çdo ditë po dëgjojmë që artikulohen kërkesa të tjera”, theksoi Ibrahimaj.
