Kreu i PD-së, Sali Berisha foli në foltoren e radhës të demokratëve përpara kryeministrisë.
Në fjalën e tij, ai tha se mazhoranca është e gatshme të japë integrimin europian, për të mbrojtur veten.
“Miq dy ditë më parë, ai u ftua të shkonte në Bruksel për t’i komunikuar këto që ne kërkojmë sot, shtetin ligjor, heqjen e imuniteteve, gjykimin e korrupsionit. Para se të nisej së bashku me Lubinë bënë mbledhjen e grupit parlamentar. Dhe në një sfidë të hapur, në një sfidë që tejkalon çdo lloj standardi i dërguan Europës mesazhin se integrimin e ndërpresim, por drejtësinë nuk e njohim. Miq në Bruksel Edi Ramës do t’i transmetohej një mesazh, mos pengo drejtësinë se ne të mbyllim derën. Ishte i thjeshtë. Sot në mëngjes Edi Rama iu përgjigj, më mbyllni derën se lëkurën time nuk e shes kurrë, se Lubinë nuk e dorëzoj sepse po të dorëzoj Lubinë duhet të dorëzoj veten time. Sonte çdo shqiptar ndodhet para këtij kërcënimi të tmerrshëm madhor”, tha Berisha.
Më tej ai shtoi se “Edi Rama me vendimin e sotëm u tha shqiptarëve se integrimin e japim, por korrupsionin nuk e dorëzojmë, por veten tonë, lëkurën tonë nuk e dorëzojmë”.
Sipas kryedemokratit, protestat në këtë moment janë jetike dhe vendimtare për të shpëtuar ëndrrën europiane të shqiptarëve.
“Ndaj dhe nesër është beteja për integrimin e Shqipërisë në BE, për dyert e hapura të Shqipërisë. Nesër mesazhi ynë është një dhe vetëm një, mos guxo të luash me fatin e shqiptarëve se fatin e Enver Hoxhës edhe ti për së gjalli”, tha Berisha.
Kujtojmë se më 10 shkurt, opozita do të zhvillojë një protestë kombëtare. Ndërkohë sot, pas mbledhjes së grupit parlamentar të Partisë Socialiste, kryeministri Edi Rama bëri me dije se pezullimi nuk është një parashikim kushtetues, ndaj socialistët do të bëjnë ndryshime ligjore, duke nënkuptuar ndryshime në Kodin e Procedurës Penale.
