Në kuadër të përgatitjes së projektligjit për minoritetet, në mjediset e MPJ-së u organizua një takim me anëtarë të Komitetit Shtetëror të Minoriteteve, përfaqësues të shoqatave të pakicave, shoqërisë civile dhe organizatave ndërkombëtare në prani të Zëvendësministres së Punëve të Jashtme Odeta Barbullushi, Sekretarit të Përgjithshëm Qirjako Qirko dhe drejtues të tjerë të këtij institucioni.
Sipas njoftimit për shtyp, tryeza e rrumbullakët pati si qëllim shprehjen e vullnetit të Qeverisë shqiptare për përmirësimin e kuadrit ligjor mbi pakicat, prezantimin e nismës për hartimin e projektligjit dhe marrjen e kontributeve të përfaqësuesve të shoqatave të pakicave, shoqërisë civile dhe organizatave ndërkombëtare.
Në hapje të tryezës së diskutimeve, Sekretari i Përgjithshëm Qirjako Qirko falënderoi pjesëmarrësit, duke theksuar se kontributi i tyre është thelbësor në kuadër të procesit të hartimit të projektligjit mbi të drejtat e pakicave.
Zëvendësministrja Barbullushi, e cila përshëndeti këtë event, theksoi se institucionet shqiptare janë të angazhuara për përmirësimin e vazhdueshëm të standardeve, për mbrojtjen dhe respektimin e të drejtave të njeriut, pjesë përbërëse e të cilave janë dhe të drejtat e pakicave.
Barbullushi theksoi se për realizimin e një procesi gjithëpërfshirës dhe efektiv është shumë i rëndësishëm bashkëpunimi dhe konsultimi i të gjithë aktorëve, përfshirë shoqatat e pakicave, shoqërinë civile, organizatat ndërkombëtare.
Gjatë takimit u theksua fakti se angazhimi i përbashkët dhe serioz i të gjithë aktorëve në procesin e përmirësimit të kuadrit ligjor mbi pakicat do të shërbejë për trajtimin e çështjeve që lidhen me to, arritjen e standarteve të mëtejshme për zbatimin e të drejtave të tyre, të cilat përkojnë gjerësisht edhe me angazhimet tona në kuadrin e procesit të integrimit evropian.
Përfaqësuesit e shoqatave të pakicave përshëndetën dhe vlerësuan njëzëri nismën e ndërmarrë nga Qeveria shqiptare dhe Ministria e Punëve të Jashtme për përmirësimin e kuadrit ligjor mbi pakicat, përmes hartimit të një ligji specifik për të drejtat e tyre.
Përfaqësuesit e shoqatave të pakicave dhe shoqërisë civile vunë theksin te njohja ligjore e pakicave, garantimin efektiv të të drejtave civile dhe politike, të të drejtave gjuhësore dhe arsimore, përfaqësimit publik etj, duke shprehur besimin se ligji i ri dhe aktet nënligjore në zbatim të tij do t’i adresojnë këto çështje./a.k
