Programi bërthamor/ Europa “gozhdon” Iranin: Afat deri në fund të verës për…

Ministrat e Jashtëm të Francës, Britanisë së Madhe dhe Gjermanisë, si dhe Përfaqësuesin i Lartë i Politikës së Jashtme të Bashkimit Europian, i kanë bërë thirrje Iranit të rifillojë menjëherë diplomacinë për programin e tij bërthamor. Ata paralajmëruan se në mungesë të një përparimi konkret deri në fund të verës, do të rivendosin sanksionet e OKB-së ndaj Teheranit.

Kjo ishte hera e parë që ministrat e tre vendeve të njohura si E3 zhvilluan një bisedë me Ministrin e Jashtëm iranian Abbas Araqchi, që nga sulmet ajrore të Izraelit dhe SHBA-së në mes të qershorit ndaj objektivave bërthamore iraniane.

Një burim diplomatik francez tha pas takimit se ministrat kërkuan rifillimin e menjëhershëm të përpjekjeve diplomatike për të arritur një marrëveshje bërthamore “të verifikueshme dhe të qëndrueshme”.

Vendet e E3-së, së bashku me Kinën dhe Rusinë, janë palët e mbetura në marrëveshjen bërthamore të vitit 2015, e cila uli sanksionet ndaj Iranit në këmbim të kufizimeve në programin bërthamor.

Rezoluta e Këshillit të Sigurimit të OKB-së që garanton këtë marrëveshje skadon më 18 tetor dhe sipas kushteve të saj, sanksionet mund të rivendosen para kësaj date. Procesi i rivendosjes do të zgjasë rreth 30 ditë.

Europianët kanë paralajmëruar disa herë se nëse nuk arrihet një marrëveshje e re bërthamore, do të përdorin mekanizmin e rivendosjes së menjëhershme të sanksioneve, i njohur si “snapback”, që do të rivendosë të gjitha sanksionet e mëparshme të OKB-së ndaj Iranit në rast të shkeljes së marrëveshjes.

“Ministrat përsëritën vendosmërinë e tyre për të përdorur mekanizmin ‘snapback’ në mungesë të përparimit konkret drejt një marrëveshjeje deri në fund të verës,” ka thënë një burim diplomatik për Reuters.

Dy diplomatë evropianë shtuan se shpresojnë të koordinojnë strategjinë me Shtetet e Bashkuara në ditët në vijim, me qëllim mbajtjen e negociatave të mundshme me Iranin së shpejti.