Ish-komandanti i Ushtrisë Çlirimtare të Kosovës Nasim Haradinaj, në një intervistë për moderatorin Besard Jaçaj sot në 17 shkurt, foli për gjyqin në Hagë të ish-krerëve të UÇK-së, që po afron drejt fundit.
Ai tha se ky do të jetë procesi gjyqësor më i turpshëm i shekullit XXI. Sipas tij, edhe dëshmitarët janë joshur me para korrupsioni dhe iu janë ofruar favore, të tilla si azili. Nasim Haradinaj vlerësoi se ish-krerët e UÇK-së janë të pafajshëm.
“Çlirimtarët janë të pafajshëm. Dëshmitarët janë shtyrë të flasin. Pretenca tejkalon dhe dënimet e gjykatës serbe. Në Hagë janë shkelur të drejtat e njeriut dhe janë shkelur të drejtat e të burgosurve. Atje janë bërë shkelje dhe ndaj shtetit të Kosovës, duke mos i lejuar qasje as Avokatit të Popullit. Gjykata e Hagës ka shkelur të drejtat juridike dhe penale. Unë pres fjalime dinjitoze nga ish-krerët e UÇK-së nesër në gjyq. Këta djem, dikur mbrojtën lirinë tonë e tani duhet të mbrojnë Pavarësinë. Unë besoj se ata janë të pafajshëm. Faktori politik dhe ai shoqëror në Tiranë dhe në Prishtinë janë bërë bashkë në këtë kauzë, që është një kauzë kombëtare. Nëse na dënojnë bazamentin e lirisë, ata mund të destabilizojnë edhe rajonin, sepse shqiptarët jetojnë në pesë shtete të Ballkanit. Unë besoj se gjyqtarët në Hagë duhet të reflektojnë. Aty ka dëshmitarë që janë joshur me azil jashtë vendit, duke iu premtuar se kurrë nuk do të zbulohen, e prandaj mendoj se kjo gjykatë është non sens. Kjo drejtësi do të jetë turp për drejtësinë në shekullin XXI dhe do jetë shembull sesi nuk duhet të jetë drejtësia. Numri i dëshmitarëve është i madh, sepse Prokuroria e ka pasur të vështirë që të gjejë prova”, u shpreh Nasim Haradinaj.
Prej ditësh në Hagë po mbahet procesi gjyqësor ndaj ish-komandantëve të UÇK-së. Nesër më datë 18 shkurt, ish-presidenti i Kosovës Hashim Thaçi dhe ish-krerët e tjerë të Ushtrisë Çlirimtare të Kosovës do të mbajnë dhe fjalën përfundimtare.
